Rhydychen, Llsgr. Coleg yr Iesu 57 – tudalen 222
Llyfr Blegywryd
222
porth. os kynn hanner dyd y barner yr oet. py+
thewnos o|r|dyd hỽnnỽ y byd yr oet. os gỽedy
hanner|dyd pythewnos o drannoeth. a|sef acha+
ỽs yỽ hynny. kanyt|oes dyd kỽbyl ac nat iaỽn
talu dryỻ dyd yn ỻe dyd. ac yn|yr|oet barnedic
hỽnnỽ y mae iaỽn y baỽp dyuot ar y|tir. ac
ỽy a|e porth. ac yna y mae iaỽn gỽneuthur dỽy
bleit. ac eisted yn gyfreithaỽl. Eisted o|r bren+
hin neu y neb a vo yn|y le a|e geuyn ar|yr heul
neu ar|yr hin. rac aflonydu o|r hin o|e wyneb ar
yngnat ỻys neu yngnat y kymỽt yr hỽnn hy+
naf a vo yn|eisted rac y vronn ef. ac ar y ỻaỽ
assỽ y hỽnnỽ yr yngnat araỻ a|vo yn|y maes.
neu yngneit ereiỻ. ac ar y ỻaỽ deheu idaỽ ef
offeirat o|r|byd yn|y maes. neu yr offeiryeit. ac
ynghylch y brenhin y deu hyneuyd a|e wyrda
o hynny aỻan o bop tu idaỽ. Odyna fford y|r
yngneit gyfarỽyneb ac ỽynt y darymret y
braỽtle. kynghaỽs yr haỽlỽr a|e laỽ assỽ ar|y|ford.
a|r haỽlỽr yn nessaf idaỽ yn|y perued. a|e ganỻaỽ
ar y ỻaỽ araỻ idaỽ. a|r ringhiỻ yn|sefyỻ drachefyn
| « p 221 | p 223 » |