LlGC Llsgr. Llanstephan 27 (Llyfr Coch Talgarth) – tudalen 42v
Credo Athanasius
42v
yỽ person y|tat a|pherson y mab. ac amgen yỽ person pob un
o·honunt a|pherson yr yspryt glan. Ac eissyoes un yỽ dwyw+
olyaeth y tat a|r mab a|r yspryt glan. a gogymeint eu gogony+
ant. a gogyfoet yỽ. kanys vn yỽ gogonyant tragywydolya+
eth y teir person. ac ỽrth hynny vn yỽ y tat a|r mab a|r ys+
pryt glan. kanys digreedic yỽ y tat. a digreedic yỽ y mab
a|digreedic yỽ yr yspryt glan. Sef yỽ hynny ny chrewyt yr
un ohonunt. a diuessur yỽ y|tat. a diuessur yỽ y mab. a
diuessur yỽ yr yspryt glan. A thragywyd yỽ y tat. a thragyỽ+
ydaỽl yỽ mab. a|thragywydaỽl yỽ yr yspryt glan. Ac eissyo+
es nyt ynt tri tragywydaỽl. Sef yỽ hynny vn diwahan yỽ
tragywydolyaeth y tri. kanny bont un berson. Ac ueỻy
nyt ynt tri digreedic. na thri diuessur. y tat a|r mab a|r
yspryt glan. namyn un digreedic. ac vn diuessur. a|hoỻ+
gyuoethaỽc yỽ|r|tat. a|hoỻ·gyuoethaỽc yỽ|r mab. a|hoỻ·gyuo+
ethaỽc yỽ|r yspryt glan. ac nyt ynt tri hoỻ·gyuoethaỽc. na+
myn vn hoỻ·gyuoethaỽc. Sef yỽ hynny vn yỽ hoỻ·aỻu y
tri. Ac ueỻy duỽ yỽ|r tat. a|duỽ yỽ|r mab. a|duỽ yỽ|r yspryt
glan. ac eissyoes nyt ynt tri|duỽ namyn un|duỽ. ac arglỽ+
yd yỽ|r tat. ac arglỽyd yỽ|r mab. ac arglỽyd yỽ|r yspryt glan.
Ac eissyoes nyt ynt tri arglỽyd. namyn un arglỽyd. Sef yỽ
hy·nny vn yỽ eu harglỽydiaeth ỽy. Ac ỽrth hynny megys
y|n kymheỻir ni o gristonogaỽl ffyd y gyffessu. ac y adef
ar neiỻtu bot y tat yn duỽ ac yn arglỽyd. a|r mab yn|duỽ
ac yn arglỽyd. a|r yspryt glan yn vn duỽ ac yn arglỽyd.
veỻy y gỽaherdir ynni drỽy greuyd kyffredin gristono+
gaeth dywedut bot tri duỽ neu dri arglỽyd. Y tat beỻach
| « p 42r | p 43r » |