Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 123v
Pa ddelw y dylai dyn gredu i Dduw
123v
Petỽeryd pechaỽt. marỽaỽl. yỽ. llesged a|diogi. a|cheigheu
yr pechaỽt hỽnnỽ ynt. yscaelussaỽ gỽassannae+
thv duỽ yn|yr amser y|dylyho dyn y|ỽneuthur
nev y gyrchv. Torri godunet. peidaỽ a|phenyt
a|dottei y|periglaỽr arnnaỽ. Annobeithaỽ am dru+
gared duỽ. tristav yr colli da bydaỽl nev dyny+
on ar kyffelyb weithredoed. Pymhet. Pechaỽt. marỽaỽl.
yỽ. a|gaỽrder. a|chebydyaeth. Sef yỽ hynny.
Whennychv o|dyn nev geissaỽ da bydaỽl moe
no digaỽn. Sef yỽ digaỽn dyn y|vỽyt a|e|diaỽt
a|e dillat. med selyf doeth. Neu gỽedy caffei dyn
da bydaỽl y|garu yn ormod. nev vot yn|llaỽ gay+
at ymdanaỽ. a|cheingev yr pechaỽt hynny ynt
treis. A|lledrat. Ac ockyr. a|phob tỽyll gyfneỽit
o|r|a|ỽnel dyn ac arall. Chỽechet. Pechaỽt. marỽaỽl. yỽ glythi+
neb. Sef yỽ hynny kymryt o|dyn o|achos digri+
uỽch knaỽdaỽl bỽyt nev lyn moe no digaỽnn. A ch+
eingev yr pechaỽt hỽnnỽ ynt. keissaỽ o|dyn tra
destlussrỽyd. nev tra chyỽeirdeb ar|vỽyt neu lyn
y|gymryt gormod ohonunt trỽy y|bei orthrỽm
ar|y|gorff nev ar|y|eneit. Neu hyt y|collei y synn+
hỽyrev. nev nerth y|gorff. nev gymryt bỽyt nev
lynn kynn offeren dyỽ sul. nev dydyev gỽylev
arbennyc. nev yn vynychach noc vn ỽeith yn dyd+
yev katkorev. A|mivilaev y|seint. ar garaỽys.
| « p 123r | p 124r » |