Rhydychen, Llsgr. Coleg yr Iesu 57 – tudalen 44
Llyfr Blegywryd
44
pan varno. haỽl. ac atteb a barn. O tri mod y
kyỻ braỽdỽr gamlỽrỽ o varn. ac ny chyỻ gỽerth
y dauaỽt. vn yỽ pan diuarno kyfryỽ ac a var+
nassei gynt trỽy gyffelybyon achỽyssyon. Eil
yỽ. pan el ar gyfeilyorn yn datkanu dadyl o|r ka+
darnhaa mỽy neu lei yn|y dadyl noc a|vu o
eireu grym. Trydyd yỽ na rodho gỽystyl gyt a|e
varn pan y rodho araỻ yn|y erbyn. O|r mod kyn+
taf y varn gyntaf a|dileir. O|r eil y datkan a ia+
ỽnheir. O|r trydyd y varn heuyt a dileir yna kyt
boet iaỽn. kanys kadarnhaaỽd y braỽdỽr hi yn
amseraỽl trỽy wystyl. Os y dadleuwr a|ebryuyc+
ka ym·wystlaỽ a|r braỽdỽr. nyt amgen pan y dat+
kano gyntaf idaỽ. ny cheif ymwystlaỽ ac ef am
y varn honno vyth wedy hynny kyt boet kam y
varn. Yn|gyffelyb y hynny ot ymwystla ef yn
amseraỽl. ac nat ymwystlo y braỽdwr ac ef y varn
a dygỽyd. Hyt yma y dywetpỽyt o sỽydogyon
ỻys y brenhin. ac eu kyfreitheu. Rac ỻaỽ trỽy nerth
duỽ y dywedir o sỽydogyon kyffredin yssyd rỽng yr
arglỽyd a|gỽyr y wlat.
| « p 43 | p 45 » |