LlGC Llsgr. Peniarth 190 – tudalen 24
Ystoria Lucidar
24
A|gỽedy hynny y symudỽyt pob peth o acha+
ỽs pechodeu y dynyon. discipulus Pa|bechaỽt a|wna+
eth adaf pan yrrỽyt o baradỽys. Magister. Chwen+
nychu a|wnaeth vot megys duỽ. ac ỽrth
hynny yn erbyn y gorchymyn y bỽytaaỽd
o|r prenn gỽahardedic. discipulus Pa drỽc vu vỽyta
aual. Magister Kymeint vu hynny o|bechaỽt
ac na aỻei yr hoỻ vyt wneuthur iaỽn
drostaỽ. kanys dyn a|dylyei vot yn vfud
y vedyant duỽ ac o|e ewyỻys. a mỽy yỽ
ewyỻys duỽ no|r hoỻ vyt. kanys pei safut
ti geyr bronn duỽ. a dywedut o|dyn ỽrthyt
y difflannei y byt oỻ o·nyt edrychut dra+
chevyn. a|dywedut o duỽ yna. ny mynnaf|i
edrych o·honat ti drachevyn. namyn edrych
arnaf|i. ny dylyut ti tremygu duỽ yr hỽnn
yssyd lewenyd y dynyon ac y engylyon
yr rydit y|r byt tranghedic. a hynny a
wnaeth adaf. sefyỻ geyr bronn duỽ. a|r
kythreul yn galỽ arnaỽ. edrych a|oruc ef
dra|e|gevyn. ac ỽrth hynny mỽy vu y pe+
| « p 23 | p 25 » |