LlGC Llsgr. 3035 (Mostyn 116) – tudalen 171v
Brut y Tywysogion
171v
honno y bodes pererinyon o gymry ar vor groec yn mynet a
chroes y gaerussalem. Yn|y vlỽydẏn hono y datgyweiraỽd
hu vab raỽlf gasteỻ gemaeron ac y gỽeresgynaỽd eilweith
vaelenẏd ac yna y|datgyweirỽyt gasteỻ colỽyn ac y|dares+
tygỽyt eluael yr eilweith y|r freinc. Y vlỽydyn rac ỽyneb
y delis hu o|mortemer rys ap hỽel ac y carcharaỽd myỽn
carchar wedy ỻad rei o|e wyr a dala ereiỻ. ac yna y diffeitha+
ỽd hywel ap ywein a chynan y vraỽt Aberteui. a gỽedy bot brỽydyr
a·rỽdost a chael o·nadunt y vudugolyaeth yd ymchoelassant
drachefyn a|diruaỽr anreith gantunt ac yna y doeth gil+
bert jarỻ vab gilberth a·raỻ y dyfet ac y darestygaỽd y
wlat ac yd adeilaỽd kasteỻ caer vyrdin a chasteỻ araỻ y
mabudrut. Y vlỽydẏn rac ỽyneb y bu varỽ sulyen richmarch
Mab y sein padarn mab maeth yr eglỽys. a gỽedy hyny
athro arbenic. gỽr o oet ac aedued o geluydyt. ymadrodỽr
dros y genedyl a dadleuỽr kymedrodwyr hedychỽr amry+
vaelon genedloed a·durn o vrodyeu eglỽysolyon a|r rei
bydolyon y dec·uet dyd o galan hydref wedy kymryt Jach+
ỽyaỽl benyt ar y gyssegredic corff a|chymyn corf crist
ac oleỽ ac aghen. ac yna y ỻas meuryc ap Madaỽc ap
ridit yr hỽn a|elwit Meuryc tẏbodẏat drỽy vrat y gan
y|wyr e|hun. ac yna y|ỻas meredud ap Madaỽc ap jtnerth
y gan hu o|mortymer. Y|vlỽydẏn hono y gỽeresgynaỽd kadeỻ
ap gruffud gasteỻ dinỽeileir yr hỽn a|wnathoed gilbert
Jarỻ. Ychydic wedy hyny y goruu ef a hỽel ap ywein gaer
vyrdin drỽy gadarn ymrysson wedy ỻad ỻawer o|e gelyny+
on a brathu ereiỻ. ychydic o|dydyeu wedy hynẏ y doeth yn
deissyfyt diruaỽr luossogrỽyd o|r freinc a|r flemisseit ẏ ẏmlad
| « p 171r | p 172r » |