LlGC Llsgr. 3035 (Mostyn 116) – tudalen 82v
Brut y Brenhinoedd
82v
naỽl. Y|brenhin bendigeit a darpara ỻyges. Ac yn neuad y
deudec y·rỽg y|gỽynuydedigyon y rifir. Yna y byd truan
adaỽat y teyrnas Ac ytlanneu yr ydeu a ymchoelant
yn anfrỽythlaỽn. Eilweith y kyfyt y dreic wen. a|merch
germania a|wahaỽd. Eil·weith y ỻenwir an gardeu ni
o|estronaỽl hat ac yn eithafoed y|ỻyn y gỽanha y dreic
coch. Ac odyna y|coronheir pryf o germania A|r tywys+
saỽc euydaỽl a gledir. Teruyn gossodedic yssyd idi yr
hỽn ny eiỻ mynet drostaỽ. Deg mlyned a deugeint
a chant y byd yn anwastatrỽyd a darystygedigaeth.
Trychant y gorffowys. Ac yna y|kyfyt gogledwynt
yn|y erbyn. A|r blodeu a greaỽd y deheuwynt a grib+
deila. Yna yd eurir y|temleu. ny orffowys ỻymder y
clefydeu. Abreid vyd o|cheiff pryf germania y|ogofeu
kanys dial y vrat a|daỽ yn|y erbyn. Grymhau ychydic
o|r diwed a|wna a|degỽm normandi neu flandrys a|e
hargyweda. kanys pobyl a|daỽ y|myỽn peisseu heyrn
ac y|myỽn pren. Yr hon a gymer dial o|e henwired
Ef a atnewydha pressỽyluaeu yr hen diwyỻodron
a rewin yr ystronyon a ymdengys. hat y dreic wen a
eỻi* oc an gardeu ni. A gỽediỻ y genedyl a degemir. gỽed
dragywydaỽl geithiwet a dyborthant ac eu mam a arch+
oỻant o geibeu ac ereidyr Yna y dynessa y dreigeu o|r rei
y darestỽg y|neiỻ y gyghoruynt. Y|ỻaỻ a ymchoel dan
wasgaỽt y henỽ Odyna y dynessaa ỻeỽ y wiryoned
ar vreiuat yr hỽn yd ergrynant tyroed freinc Ac ynys+
solyon dreigeu. Yn|dydyeu hỽnnỽ yd ymhoelir eur o|r
lilium a|r|dynhaden. Ac aryant a ret o garneu y rei a
drefhont. Y calamistreit a wisc amryfalyon gnuoed
a|r abit vchaf a trychir. hedỽch a gaffant y bỽystuileit
| « p 82r | p 83r » |