LlB Llsgr. Cotton Cleopatra A XIV – tudalen 73v
Llyfr Cyfnerth
73v
Ny byd na dirỽy na chamlỽrỽ am neb ede ̷+
inaỽc kyt lletrataher namyn talu y werth
kyfreith ony cheffir e| hun.
E Neb a diwatto mach rodet lỽ seith nyn
nessaf y werth. petwar o parth y tat
a| deu o parth y uam. Ac ynteu e| hunan
seithuet. Y neb a| diwatto mechniaeth.
rodet lỽ seith nyn yn| y kyffelyp vod. Ac
ony byd y genedyl yn vn wlat ac ef. rod+
et y lỽ e| hunan uch pen seith allaỽr kysse+
gyr yn vn cantref ac ef canys uelly y di ̷+
wedir bri·duỽ. O teir ford yd ymdiueicha
mach. Vn o·honu o talu or talaỽdyr dros ̷+
taỽ. Yr eil yỽ o rodi oet or haỽlỽr yr talaỽ ̷+
dyr yn aỽsen y uach. Trydyd yỽ o dỽyn
gauel or haỽlỽr ar y talaỽdyr heb ganhat
y uach ac yna talet tri buhyn camlỽrỽ
yr brenhin. Oet mach y ymgoffau ae
mach ae nat mach tri dieu. Yspeit mach
y paratoi tal gysseuin os ef e| hunan ae
tal. tri dieu. O teir ford y differir mach
| « p 73r | p 74r » |