LlGC Llsgr. 3035 (Mostyn 116) – tudalen 152v
Brut y Tywysogion
152v
nyt amgen arỽ·ndel a blif a bryg yn erbyn yr hỽn yd oed yr holl
dỽyỻ yr hỽn a|rỽndwlassei* yn erbyn arch y brenhin ac am+
ỽythic. Ernỽlf a|achubaỽd penuro e|hun a gỽedy hyny kyn+
uỻaỽ ỻuoed a orugant a galỽ y brytanyeit ygyt a gỽneuthur
ysclyfyaetheu ac ymhoelut yn ỻawen adref a|phan yttoe+
dit yn gỽneuthur y|petheu hyny y|medylyaỽad ernỽlf hedychu
a|r gỽydyl ac erbyneit nerth y|gantunt. ac anuon a|wnaeth
kennadeu hẏt yn jwerdon. nyt amgen geralt ystiwart a|ỻa+
wer o|rei ereiỻ y erchi merch murtart vrenhin yn briaỽt idaỽ
a hyny a|gafas yn haỽd a|r kennadeu a deuthant eu gỽlat yn
hyfryt. a|murtart a anuones y verch a ỻawer o|logeu aruaỽc
gyt a hi yn nerth ydaỽ. a gỽedy ymdrychafel o|r jeirỻ y|myỽn
balchder o achaỽs y|petheu hyny ny chymerassant dim hedỽch
y gan y brenhin. ac yna y|kynnuỻaỽd henri vrenhin ỻu pop
by·chydic. ac yn gyntaf y|kylchynaỽd casteỻ arỽndel drỽy ym+
lad a hi ac o·dyna y kymerth casteỻ blif a hyt yg|gasteỻ brug
ac y|mheỻ y|ỽrthaỽ y|pebyỻaỽd a|chymryt kygor a|oruc pa
vod y darystygei ef y ieirỻ neu y ỻadei neu y gỽrthladei o|r
hoỻ teyrnas. a hyny penaf a|gauas yn|y gygor anuon kenadeu
o|r brytanyeit ac yn|wahanredaỽl ar jorwerth vab bledyn
a|e|wahaỽd a|e alỽ ger y vron ac adaỽ mỽy idaỽ noc a gaffei
y|gan y ieirỻ. a|r kyfran a berthynei y gael o tir y brytanyeit
hyny a|rodes y brenhin y jorwerth vab bledyn yn ryd tra vei
vyỽ y brenhin heb tỽnc a heb tal. sef oed hyny powys a|chere+
digyaỽn a haner dyfet. kanys yr haner araỻ a rodyssit y
vab baldwin a gỽyr a|chetweli. a gỽedy mynet Jorwerth vab
bledyn y gasteỻ y|brenhin. anuon a oruc y|anreithaỽ kyfoeth
robert y arglỽyd. a|r anuonedic lu hỽnỽ gan Jorwerth
| « p 152r | p 153r » |