LlGC Llsgr. Peniarth 11 – tudalen 184v
Ystoriau Saint Greal
184v
yn deckaf ac y gaỻaỽd. A unbennes heb·y gỽalchmei pỽy yssyd
yn|yr elor. Arglỽyd heb hi marchaỽc urdaỽl yr hỽnn a|las drỽy
ualchder maỽr. Pa|le yr|aey di heno heb·y gỽalchmei. Mi a|af
y|r ỻannerch goch heb hitheu y anuon y corff yma yno. Paham
heb·y gỽalchmei y dygy di efo yno. achaỽs heb hi y goreu a|wn+
el yno ac a ymwano efo bieu dial angheu y|gỽr hỽnn. Y|uorw+
yn a|aeth ymeith ar hynny. a gỽalch a|aeth tu a|r casteỻ. ac
nyt oed neb yndaỽ namyn vn marchaỽc urdaỽl a|gỽas yn|y
wassanaethu. Gỽalchmei yna a disgynnaỽd. a|r|gỽr bioed y
casteỻ a vu lawen ỽrthaỽ. ac a|beris tynnu y arueu y amdanaỽ
a|e anrydedu yn|y meint y gaỻaỽd y nos honno. At ~
T Rannoeth pan debygassei walchmei gael mynet yme+
ith. ef a|doeth y gỽr bioed y casteỻ attaỽ. ac a|dywaỽt ỽrth+
aỽ. Arglỽyd heb ef nyt ey di ueỻy. kanys porth y casteỻ yma
ny bu agoret eiryoet yny bereis y agori ef y|th erbyn di. ac am
hynny arglỽyd heb ef amdiffyn di vi yn erbyn marchaỽc urda+
ỽl yr|hỽnn yssyd yn mynnu vy ỻad o achaỽs ỻetty o·honaf nos+
weith brenhin y casteỻ marỽ. yr hỽnn a|oed yn ryuelu yn er ̷+
byn brenhines y|morynyon. Pa ryỽ daryan yssyd idaỽ ef heb+
y gỽalchmei. arglỽyd heb ynteu taryan eureit. a chroes goch
yndi. ac y|mae ynteu yn vilỽr cadarn dewr diogel. Ar vym|perigyl
heb·y gỽalchmei pei dywettut ym chỽedleu y ỽrth y marchaỽc
yd|ỽyf yn|y geissyaỽ. mi a|th amdiffynnỽn di yn erbyn hỽnnỽ
yn oreu ac y gaỻỽn i. o|r mynn ef gỽneuthur yr ymbil nac yr
anmyned. ac os mynn mi a|dangossaf vy nerth idaỽ yr dy dio+
gelu di. Pa|ryỽ ỽr yr|ỽyt ti yn|y geissyaỽ heb ynteu. Paredur
heb·y gỽalchmei yr|ỽyf|i yn|y geissyaỽ. marchaỽc urdaỽl o|lys
| « p 184r | p 185r » |