Breudwd Welsh Prose 1300-1425
Cymraeg

BL Additional MS. 19,709 – page 66v

Brut y Brenhinoedd

66v

idav ef hefẏt yd enniỻyssei y dayoni anyanavl a oed
arnaỽ y veint rat honno hyt pan oed garedic ef gan
bavb o|r a glyỽhei dywedut ymdanaỽ an·waethach
o|r a|e gỽelei. ac vrth hynny gvedy y arderchockau
ef o|r vrenhinaỽl enryded hỽnnỽ gan gadỽ oho+
naỽ y notta·edic defavt ef a ymrodes y haelder.
ac odyna kymeint o amylder marchogyon a|lith+
rei attaỽ. a|megys y dyffygyei idaỽ da y|rodei
vdunt yn vynych. ac eissoes py diỽ bynac y bo
haelder anyanavl y·gyt a|phrouygedic volyant
kyt bo eisseu arnav ar talym. yr hynny ny at
duỽ wastat aghenoctit y argywedu idaỽ. ac vrth
hynny arthur kanẏs molyant a gytymdeithoccaei ha+
elder a dayoni. ỻunyaethu|ryfel a|oruc ar y|saes+
son hyt pan vei oc eu golut ỽy y kyfoethogei ẏn+
teu y teulu a|e varchogyon. kanys iavnder a dyscei
hynny idaỽ. kanys ef a dylyei o trefftadavl dy+
lyet hoỻ lywodraeth ynys. prydein. a|chynuỻav a|o+
ruc ef yr hoỻ jeuectit* a oed darystygedic idaỽ.
a chyrchu parth a|chaer efraỽc. a gvedy gỽybot
o golgrim hynny kynuỻaỽ a|oruc ynteu y
saesson a|r yscotteit a|r fichteit. ac y·gyt anei+
ryf luossogrvyd nifer gantav mynet yn erbyn
arthur hyt yg|glan dulas. a gvedy ym·gyfar+
uot. yna o pop parth y dygỽydassant ỻawer
o|r deu·lu. ac o|r|diwed arthur a|gafas y vudugol  ̷+
yaeth a|fo a|oruc golgrim y dinas kaer efraỽc.