BL Additional MS. 19,709 – page 72r
Brut y Brenhinoedd
72r
hynny custenhin mab elen. A maxen. mab. ỻywelyn. pop
vn o|r rei hynnẏ yn gar agos imi o gerenyd. ac yn vren+
hined arderchaỽc o goron ynys. prydein. yr vn gvedy i gilyd
a gaỽssant amherodraeth rufein. ac vrth hynny poni ̷
bernỽch chỽi bot yn iavn i|minheu deissyfeit teyrn·get
o rufein. O freinc ac o|r ynyssed ereiỻ ny vrthebvn ni
vdunt vy kany doethant y hamdiffyn pany gveryscyn+
assam nac o|e gỽarafun. ac vrth hynny ny vrth·ebvn
ni vdunt o|r rei hẏnny.
A gỽedy teruynu o arthur y ymadraỽd. Hywel
vab emyr|ỻydaỽ a vrthebavd ymlaen paỽb y ym ̷+
adraỽd arthur val hynn. bei traethei baỽb o·honom
ni oỻ. a|medylyaỽ pop peth yn|y vedỽl. ny thybygaf
gaỻu o neb ohonam ni rodi kygor gverthuorogach
nac atteb grynoach na doethach no|r hỽn a|rac·uedyl+
yaỽd racweledic doethineb yr arglỽyd arthur e|hun.
ac ỽrth hynny yr hyn a|racwelas medỽl doeth an+
yanaỽl gỽastadaỽr; ninheu yn hoỻavl moli hvnnỽ
a|dylyỽn a|e ganmaỽl yn wastat. kanys yn|herwẏd
y dylyet a dywedy ti o|mynny ti kyrchu rufein ny phe+
drussaf. i. yd aruervn ni o|r vudugolyaeth hyt tra vom
ni yn amdiffyn an rydit. hyt tra geissom ni an iaỽn
y gan an gelynyon y|peth y|maent vy yn gam yn|y geis+
saỽ y genhym ninheu. kanys pỽy bynac a|geisso dỽyn
y vreint a|e dylyet gan gam y gan araỻ. teilvg yv i+
dav ynteu coỻi y vreint a|e|dylyet. ac ỽrth hynny ka+
nys gvyr rufein yssyd yn keissaỽ dỽyn yr einim ni ̷ ̷
| « p 71v | p 72v » |