BL Additional MS. 19,709 – page 79v
Brut y Brenhinoedd
79v
y rei meirỽ yn kyffroi y rei byỽ ar lit ac ymlad. Ac mal
yd oed blin a ỻafurus y yscr˄ẏenu na|e datkanu. kanẏs o pob
parth y brethynt ac y brethit vynteu. vynteu a|ledynt. ac
vynteu a|ledit. ac o|r diwed gỽedy treulaỽ ỻawer o|r dyd
yn|y mod hỽnnv. arthur a|e vydin a gyrchỽys y vydin ẏ
gỽydyat bot y tỽyỻỽr gan vedraỽt yn|dianc. ac a·gori fy+
ryd vdunt a|r cledyfeu. Ac yn|diannot mynet drostunt
a gỽneuthur tristaf aerua onadunt. kanẏs yn|y ỻe y dy+
gỽydỽys y|r ysgymunediccaf vradỽr hỽnnỽ gan vedraỽt
a|ỻawer o vilyoed y·gyt ac ef. ac eissoes yr hẏnny ny
foassant y rei ereiỻ namyn ym·gynuỻaỽ yghyt o|r maes
oỻ. ac yn herwyd eu gleỽder keissav ymgynhal a gỽrth+
ỽynebu y arthur. Ac vrth hẏnnẏ gỽychraf a girattaff.
a chreulonaf aerua a vu yrydunt yna o|pop parth. ac eu
bydinoed yn syrthyaỽ. Ac yna o parth vedraỽt y|syrth+
yssant chledric. ac elefyỽẏs brenhin o|r saesson. O|r gỽy+
dyl. giỻapadric. giỻamor. giỻasel. giỻamỽri. yr yscot+
teit a|r fichteit ac vẏnt ac eu har·glỽydi oỻ hayach
a las. Ac o pleit arthur y ỻas. Osbrinc brenhin ỻych+
lyn. Echel brenhin denmarch. kadỽr ỻymenic iarỻ
kernyv. kaswaỻaỽn a ỻawer o vilyoed y·gyt ac ỽynt
rỽg y brytanyeit a|chenedloed ereiỻ a ducsynt y·gyt
ac vynt. ac ynteu yr arderchaỽc vrenhin arthur a vrath+
vyt yn agheuaỽl. ac a ducpỽyt odyna hyt yn ynys
auaỻach y iachau y welioed. Coron teyrnas ynys. prydein.
a|gymynnỽys ynteu y gustenhin vab cadỽr iarỻ ker+
nyỽ. y gar. Dvy vlyned a deu vgeint a phump cant
gỽedy dyfot crist yg cnaỽt oed hẏnnẏ ẏna.
| « p 79r | p 80r » |