Breudwd Welsh Prose 1300-1425
Cymraeg

BL Harley MS. 958 – page 45v

Llyfr Blegywryd

45v

adeil o|r deudec erỽ. vn troed·ued ar pẏm+
thec a uẏd ẏn hẏt ẏr hirieu. Ac vn ieu
ar pẏmthec a wnant hẏt ẏr erỽ a dỽẏ vẏd
ẏ ỻet. Seith tref vẏd maenaỽr vro. Teir
tref ar dec maenaỽr ỽrthtir. Hanher
punt a daỽ ẏ|r brenhin pan teruẏnher
rỽg dỽẏ dref a phedeir ar|hugeint ẏ|r braỽt+
wẏr. Hanher punt a geiff ẏ brenhin o
pop rantir a varner ẏ dẏn o gẏfreith. Pan
varnher tref ẏ dẏn ẏ bo sỽẏd o·honei. punt
a hanher a geiff ẏ brenhin ẏ gantaỽ. 
P ỽẏ bẏnhac a o·vẏnho datanhud o|r tir
a gẏnhalẏassei ẏ tat hẏt varỽ trỽẏ
wresgẏn o eredic. datanhud o gỽbẏl a|dẏ+
lẏ ẏ gaffel. Onẏ bẏd o gorff ẏ tat etiued
a vo teilẏghach noc ef. neu vn vreint ac ef
ẏn kẏnhal ẏ tir ẏn|ẏ erbẏn. neu ẏn kẏt+
ouẏn datanhud ac ef ẏn|ẏ ỻẏs. Ac ẏno ẏ tric heb
ỽrtheb ẏ neb o|r tir ẏnẏ del amser medi ac ẏm+
choelut ẏ gefẏn ar ẏ|das. Ony daỽ y|braỽt hẏ+
naf a|r teilẏghaf. O|r daỽ a|ỽo teilẏghach. ef
a geiff oỻ. Os ẏ gẏffelẏp a daỽ. ẏ kẏffelẏp
a geiff o ran. Os datanhud karr a|uernir
ẏ dẏn o dẏuot a|charr ẏ|r tẏr. gorffowẏs a
geiff ẏno naỽ diwarnaỽt. Ac ẏn|ẏ naỽuet+
dẏd ẏ|dẏrẏ attep. Ac ẏn|ẏr eil naỽuetdẏd barn.