BL Harley MS. 958 – page 6v
Llyfr Blegywryd
6v
gẏnheil breint llẏs ẏn aỽssen brenhin.
Punt a hanner ẏỽ ebediỽ distein. Gobẏr
ẏ verch ẏỽ punt. Teir punt ẏỽ|ẏ chowẏll.
Seith punt ẏỽ ẏ hegwedi.
E ffeirat teulu a geiff ẏ wisc ẏ penẏtẏo
ẏ brenhin ẏndi ẏ gẏrawẏs ẏn erbẏn
ẏ pasc. Ac ẏ·ueỻẏ effeirat brenhines a|ge+
if ẏ wisc hitheu. Deudec|mu a telir dros
sarhaet effeirat teulu. A|r trayan a geif
ef. A|r deu parth ẏ|r brenhin. Ef a geif of+
frỽm ẏ brenhin a|e teulu ẏn|ẏ teir gỽẏl ar+
benhic. Y varch a geif o|r ebran kẏmeint
a ran deu uarch. Ac ẏ·ueỻẏ pob sỽẏdawc
ar·benhic. Ef ẏỽ ẏ|trẏdẏd dẏn a geidỽ
breint ỻẏs ẏn aỽsen ẏ brenhin. Offei+
rat ẏ vrenhines a geif march ẏn wosseb
ẏ gan ẏ vrenhines. Effeirat teulu. a|r
hebogẏd. a|r penkẏnẏth. a|r braỽdỽr llẏs.
a|r pengwastraỽt a gaffant veirch ẏ gan
ẏ brenhin ỽrth eu reit. Ac eu tir a gẏnha+
lẏant ẏn rẏd. Tri rẏỽ wassanaeth ẏs+
sẏd ẏ offeirat ỻẏs ẏn|ẏ dadleuoed. vn ẏỽ
dileu pob dadẏl a darfo ẏ|theruẏnu o|r rol.
Eil ẏỽ kadỽ ẏn ẏscriuenedic hẏt varn
pob dadẏl nẏ theruẏnỽẏt. Trẏdẏd yỽ
bot ẏn baraỽt ac ẏn diuedỽ ỽrth reit
| « p 6r | p 7r » |