Oxford Jesus College MS. 119 (The Book of the Anchorite of Llanddewi Brefi) – page 123r
Pa ddelw y dylai dyn gredu i Dduw
123r
Naỽuet. Geir. Dedyf. yỽ. na hỽennycha na thir. na|thy
dy|gymodaỽc. Sef yỽ hynny trỽ* dỽyll nev gamỽed.
Decuet Geir. Dedyf. yỽ. na hỽennycha ỽreic dy gymodaỽc.
na|e ỽas na|e vorỽynn na|e annyveil. Sef yỽ hynny;
na hỽennycha da kychỽynnaỽl dy gymodaỽc trỽy
dỽyll. nev drỽy gamỽed. ~ ~ ~ ~
GWedy kattỽo dyn y|degeir dedyf. Reit yỽ idaỽ
ymgadỽ rac gỽnneuthur nev gytssynnyaỽ yn
vn o|r seith pechaỽt marỽaỽl. A chynntaf pechaỽt
o·honunt yỽ. Syberỽyt. ymryvygu o|dyn yn|y gev+
daỽt. A cheissaỽ ymdyrchauel yn vch noc y|dylyho.
nev ymgyfuartalu ac vch noc ef. nev tremygu
y|gystaldyn. nev a|vei is noc ef. A cheingev yr pecha+
ỽt hỽnnỽ ynt. Annvfylltaỽd. Gỽarthav dyn. nev y
tremygv. Gỽnneuthur hoffed o greuyd. nev o|pecha+
ỽt. bot yn ryuygus yr golut bydaỽl. neu yr boned
nev gampev da. ar kyffelyb weithredoed. Eil pech*+
aỽl marỽaỽl yỽ. kennvigen. Sef yỽ hynny bot yn
drỽc gann dyn gỽelet y|gymodaỽc yn kynyddv ar
da bydaỽl nev gampev da. nev greuyd. nev vot yn
llaỽen gantaỽ gỽelet gofuut. nev drỽc yn damỽein+
aỽ idaỽ. Trydyd. pechaỽt marỽaỽl yỽ. digassed. Sef
yỽ hynny. kadỽ o|dyn lit a|gỽennỽyndra yn erbynn
y gymodaỽc o achos collet nev gam a|ỽnelit idaỽ.
A cheissaỽ ymdial ac ef ar|drỽc trỽy eir nev ỽneithret*.
| « p 122v | p 123v » |