Oxford Jesus College MS. 119 (The Book of the Anchorite of Llanddewi Brefi) – page 95r
Buchedd Dewi
95r
Dauyd heb yr athro edrych vy llygeit y|maent ym
poeni. Arglỽyd athro hep y|dauyd. nac arch ymi e+
drych dy lygeit. yr ys deg mlyned y deuthum i atat
ti y dyscu. nyt edrycheis i ettỽo y|th ỽyneb di. Sef
a oruc yr athro yna medylyaỽ a ryuedu keỽilyd y
mab a|dyỽedut. kannys velle y|mae heb ef vrth
y|mab dyro di de laỽ ar vy|ỽyneb i a|bendicka vy lly+
geit a mi a|vydaf holl yach. A phann rodes dauyd
y|laỽ ar y lygeit ef. y|buant holl yach. Ac yna y|ben+
digaỽd paulinus dauyd. o|bop bendith a geffit ynny*
ysgriuennedic yn|y dedyf hen. Ac yn|y neỽyd. Yna y
doeth angel at paulinus a|dyỽedut vrthaỽ val
hynn. amser heb yr angel yỽ dauyd sant vynet
odyma y ỽneuthur y petheu ysyd dyghetuen y|gan
duỽ idaỽ y ỽnneuthur. Odyna y|deuth deỽi hyt
yn glastynburi. ac yno yr|adeilaỽd ef eglỽys. Deỽi
a deuth yr lle yr oed dỽfyr llaỽn o wenỽyn. Ac a|e ben+
digaỽd. Ac a|ỽnaeth y|dỽfuyr hỽnnỽ yn dỽymynn
hyt dydbraỽt. A hỽnnỽ a elỽir yr enneint tỽymynn.
Odyna y deuth deỽi hyt yg|kroỽlan a|hyt yn repe+
cỽn. odyna y|deuth y gollan a glasgỽin. Odyna yr
adeilaỽd lann llieni yglann hafuren. Odyna y ro+
des ỽaret y|pebiaỽc vrenhin ergyng a|oed yn dall.
Odyna yr adeilaỽd eglỽys yg gỽent yn|y lle a elỽir
raclan. |
| « p 94v | p 95v » |