Oxford Jesus College MS. 57 – page 51
Llyfr Blegywryd
51
kyt bo gỽirion. kany eiỻ kenedyl gỽadu yn|y
uarỽ yr hynn ny wadaỽd ef yn|y vywyt Oer+
gỽymp galanas yỽ. pan ladho dyn dyn araỻ
a|dodi oet dyn y wneuthur iaỽn drostaỽ. a|e
lad ynteu o|dyn o genedyl araỻ ny|s|dylyo oer+
gỽymp galanas y gelwir hynny rac trymet
y goỻi ef. ac adaỽ y gyflauan a|wnathoed
ar y genedyl a|goruot y thalu. Pỽy bynnac
a|watto ỻad dyn y|myỽn ỻuyd rodet ỻỽ deng+
wyr a|deugeint. a|thalet chweugeint. Y neb
a|wnel kynỻỽyn. talet dirỽy deu·dyblic y|r
brenhin. a gỽerth y dyn yn deudyblic. a|tha+
let y|r genedyl heuyt breint y dyn a ladher.
O Naỽ affeith tan kyntaf yỽ. rodi
kynghor y losgi. Eil yỽ duunaỽ am
y ỻosc. Trydyd yỽ mynet y|nghedymdeithas
y dyn a|losgo hyt y ỻe y ỻosger. Pedweryd yỽ.
ymdỽyn y rỽyỻ. Pymhet yỽ ỻad y tan. Chỽe+
chet yỽ keissyaỽ dilỽyf. Seithuet yỽ. chỽythu
y tan yny ennynho. Wythuet yỽ. rodi y|tan
| « p 50 | p 52 » |