Oxford Jesus College MS. 57 – page 9
Llyfr Blegywryd
9
redec y march kyntaf a vo yn|y gadỽ. Naỽd y
penkynyd yỽ. hyt y ỻe peỻaf y|breid|glywer y
gorn. Naỽd y gỽas ystaueỻ yỽ. o|r pan elher y
wruynna a thannu gỽely y brenhin o|r brỽyn
a|e gudyaỽ a|diỻat. yr hyt honno hebrỽng y dyn.
Naỽd distein brenhines yỽ. o|r pan dechreuo sef+
yỻ yn|y sỽyd yn yr ystaueỻ yny el y dyn diweth ̷+
af o|r ystaueỻ y gysgu. Naỽd offeiryat brenhin+
es yỽ. hebrỽng y dyn hyt yr eglỽys nessaf. Na+
ỽd y bard teulu yỽ. hebrỽng y dyn att y penteu+
lu. Naỽd y gostegỽr yỽ. o|r ostec kyntaf a|dotto
yn|y neuad hyt y diwethaf. Naỽd dryssaỽr neu+
ad yỽ. hebrỽng y dyn hyt y vreich a hyt y wi+
alen att y porthaỽr. kanys ef a|e herbyn. Naỽd
y porthaỽr yỽ. kadỽ y dyn y roder naỽd idaỽ
hyt pan del y penteulu drỽy y porth parth a|e
letty. a|e oỻỽng y·gyt ac ef y gymryt naỽd hyt
pan adawo y|dyn diwethaf y ỻys. Naỽd drys+
saỽr ystaueỻ yỽ. hebrỽng y dyn att y porthaỽr.
Naỽd morỽyn ystaueỻ yỽ. kymeint a gỽas
| « p 8 | p 10 » |