NLW MS. Llanstephan 27 (The Red Book of Talgarth) – page 65r
Buchedd Dewi
65r
1
doeth dauyd a|e disgyblon. nyt|amgen. aedan. ac eliud. ac is+
2
mael. a ỻawer y·gyt ac ỽynt hyt y ỻe a uanagassei duỽ u+
3
dunt. nyt amgen hyt yng|glyn rosin. Hodnant y gelw+
4
ir y ỻe hỽnnỽ. Kyntaf ỻe dan yr awyr y kynneuassant ỽy
5
dan vu yno. A phan gynneuassant ỽy dan yno y bore glas
6
y kyuodes mỽc. ac y kylchynaỽd y mỽc hỽnnỽ yr ynys honn
7
oỻ. a ỻawer o iwerdon. a hynny o|r bore glas hyt bryt gosper.
8
Ac yna yd arganvu tywyssaỽc a|elwit boya o gysgot y
9
mỽc hỽnnỽ. ac o lit eisted a|oruc y|myỽn creic uchel o|r
10
bore hyt bryt gosper heb vỽyt heb diaỽt. a|e wreic a uedraỽd
11
arnaỽ yno. ac a|ovynnaỽd idaỽ paham na mynnei na bỽyt
12
na diaỽt. Dioer heb ef trist ỽyf a|ỻidiaỽc. kanys mỽc a weleis
13
hediỽ yn kyuodi o|hodnant. ac yn kylchynu ỻawer o dinas+
14
oed. a|r gỽr heb ef a|gynneuaỽd y tan hỽnnỽ. y vedyant e*
15
a gerda fford y kerdaỽd y mỽc. Je heb y wreic yd wyt yn yn+
16
vyt. kyuot y vyny a|chymer dy wyr y·gyt a thi. a|ỻad y neb
17
a gynneuaỽd y tan hỽnnỽ ar dy dir di heb dy gennyat. Ac
18
yna y|doeth boẏa a|e ysgỽieryeit y·gyt ac ef ar|uedỽl ỻad
19
dewi a|e disgyblon. A phan doethant y|r ỻe yr oed dewi y dy+
20
gỽydassant yn|y cryt hyt na eỻynt ỽy wneuthur dim drỽc
21
y dewi nac y|disgyblon o·nyt eu gỽattwar. a dywedut geireu
22
tremygedic yn eu kyueir ac ymchoelut adref. Ac ual y by+
23
dynt veỻy nachaf wreic boya yn kyuaruot ac ỽynt. ac yn
24
dywedut. yn bugelyd ni heb hi. a dywedassant ry varỽ yn
25
hoỻ ysgrybyl ni. Nyt amgen an gỽarthec. a|n ychen a|n
26
greoed a|n|deueit. ac eu bot oỻ yn veirỽ ac eu ỻygeit yn a+
27
goret. Ac yna kỽynaỽ ac udaỽ a|griduan a|oruc boya a|e wre+
28
ic
| « p 64v | p 65v » |