NLW MS. Llanstephan 4 – page 17r
Chwedlau Odo
17r
nistyr y ỻygot oỻ dyeithyr vn ormes
o hen lygoden ystryỽgar a|oed yn ymgadỽ
racdi. ac yn hynny medylyaỽ a|oruc y cath
pa vod y kaffei daly y ỻygoden honno a|e
dinustyr. a|medylyaỽ keluydyt newyd.
nyt amgen peri gỽneuthur abit mynach
idaỽ. ac eiỻaỽ y varyf a|e gorun. ac eisted
ym|plith y myneich. a bỽyta ac yfet a
oruc. ac yn hynny dyuot a|wnaeth y
ỻygoden y|r ffreutur. a|disgỽyl a welei dim
y ỽrth y cath. a phryt na|s|gỽeles ỻawen ̷
a hyfryt vu a rodyaỽ a|wnaeth dan y
byrdeu. a chynnuỻ y bỽyt yn|diofyn. ac ̷
o|r diwed dynessau a|oruc tu a|r ỻe yr oed
y cath yn eisted. a|gỽedy y hirodef ny|s ̷
gadei y anyan idaỽ a|vei hỽy neitaỽ a|oruc
a|daly y ỻygoden yn|ffest ac yn|gadarn.
Ac yna y dywaỽt y ỻygoden. Paham y
dely di vyui. Pa ryỽ greulonder a|wney
a mi. ponyt mynach ỽyt ti. a|gỽr e+
glỽyssic. Yna y dywaỽt y cath. Yn|wir
ytti yr|daet y pregethych ny dienghy
yn|diboen. kanys pan vynnỽyf|i mi a
vydaf vynach. a|phryt na|s mynnỽyf
mi a|vydaf gath. et|cetera. Deaỻe* y darỻeaỽdyr.
| « p 16v | p 17v » |