NLW MS. Llanstephan 4 – page 37v
Breuddwyd Pawl
37v
pan adolygoch ymi gaffel gorffowys
o·honaỽch. ef a|m croget i yroch chỽi. ac
a|m gỽanpỽyt a gỽaeỽ. ac a|drewit ynof
gethri. ac a|gymysgỽyt ym win ỻygre+
dic a bystyl o|e yfet. a minneu a ymrod+
eis y angheu yr aỽch bywyt chỽi ac yr
kaffel ohonaỽch gyt a mi buched dra+
gywyd. Chỽitheu amgen a vuaỽch
anghenogyon ỻadron kebydyon sybe+
rwon. kyghoruynnussyon. emeỻtige+
digyon a budron. ac ny wnaethaỽch
dim da na phenyt na dyrwest nac
alussen; namyn syberwon a|diffyd
vuaỽch yn aỽch bywyt. Odyna y
syrthyassant Mihagel a phaỽl a mil
o vilyoed o engylyon rac bronn mab
duỽ y leuein ac y adolỽyn idaỽ gaffel
gorffowys y|r eneideu bop duỽ sul oc eu
poeneu. Yr Mihangel. heb yr arglỽyd ac yr
paỽl. ac yr vy engylyon. ac yn bennaf
yr vyn|daeoni vy|hun mi a rodaf ud+
unt gorffowys o|r naỽuet aỽr duỽ
sadỽrn hyt yr aỽr gyntaf duỽ ỻun.
Ac yna dryssaỽr uffern yr hỽnn a|elwit
etyrual. ac enỽ y gi oed crebreus*. hỽn+
nỽ a drychafaỽd y benn y ar yr hoỻ bo+
| « p 37r | p 38r » |