NLW MS. 3035 (Mostyn 116) – page 134r
Brut y Brenhinoedd
134r
hau katua. mab. Jago. o goron y|teyrnas. ym·gynuỻaỽ a|o+
rugant y brytanyeit yn ỻỽyr attaỽ. Ac yn gyttunn
yd aethant yn ol edelflet drỽy humur A phan gigleu
edelflet hyny. Ynteu a gyn·uỻỽys y hoỻ saysson attaỽ.
Ac odyna mal yd oedynt o|pop parth yn bydinaỽ y deuth+
ant eu ketymdeithon y·rydunt a gỽneuthur tagne+
fed y·rydunt ar y wed hono Gadu y|edelflet parth draỽ
y humyr Ac y gatuan y parth yma. Nyt amgen ỻoe+
ger a|chymry a|chernyỽ A choron y teyrnas A chadarn+
hau hynẏ drỽy ar·uoỻ a gỽystlon. A gỽedy daruot hẏnẏ
kymeint vu getymdeithas y·rydunt Ac yd oed gyffre+
din pop peth y·rydunt Ac odyna y darfu ysgymot
rỽg edelflet a|e wreic briaỽt. A|chymeint vu y|gas erni
a hyt pan y deholes o|e gyfoeth. A|chymryt gỽreic araỻ
a oruc ynteu. A beichaỽc oed wreic edelflet yna A|hyt at
gatuan y|kyrchaỽd hi y|geissaỽ gan gatuan y|chymot a|e
gỽr. A|gỽedy na aỻei hi o neb ford gaffel kymot. trigyaỽ
a oruc hitheu yn ỻys katuan hyt pan a·net mab idi. Ac
yn|y ỻe gỽedy hyny y ganet mab y gatuan o|e wreic yn+
teu. kanys yn yr vn amser yd oed y dỽy wraged yn veich+
aỽc. Ac odyna y deu vab a vagỽyt y·gyt yn|y mod y dyly+
it meithryn eu kyfryỽ. a|mab katuan a elwit katwaỻaỽn
a|r ỻaỻ a|elwit etwin A gỽedy eu bot yn weisson jeueinc
ỽynt a|e hanuonassant hyt ar selyf brenhin ỻydaỽ
y|dyscu moesseu a|defodeu a milỽryaeth a|e kymryt yn
garedic ỽynt a|wnaeth selyf hyt pan gaỽssant y|getym+
deithas ef a|e garyat yn gymeint Ac nat oed neb oc
eu kyfoeton a|garhei yn gymeint ac ỽynt. nac a vei
digrifach gantaỽ gytymdidan ac ỽynt Ac o|r|diwed
yny bei reit yn vynych yn|y vlaen yd|eynt yn yr ig ~
| « p 133v | p 134v » |