NLW MS. Peniarth 11 – page 172r
Ystoriau Saint Greal
172r
dy arglỽyd di heb·y clamados. Ef a elwir meliot heb ef. o loe+
gyr. ac ef a|aeth y geissyaỽ gỽalchmei. y gỽr yssyd arglỽyd ar+
naỽ ynteu. Myui heb·y clamados a|e·deweis walchmei yn|ỻys
yr amheraỽdyr arthur pan|doethum odyno. Eissyoes yr oed
yn|y vryt ynteu yna vynet ymeith. Myn vyng|cret i heb y
gỽas mi a vynnỽn y gyuaruot a|thi drỽy amot gỽybot o+
honaỽ ỻad ohonat y leỽ ef. a gedymdeith heb·y clamados
a ytiỽ dy ueistyr di yn gyn gỽrteissyet ac y dywedy di. os da
gan duỽ ny byd gỽaeth rof|i ac ef yr ỻad y ỻeỽ yn amdiffyn
vy eneit a|m corff. a mi a|archaf y duỽ vyn|dianc rac kyf+
aruot a|r|neb a|wnel drỽc ym. ac ar hynny kerdet a|wnae+
thant y marchaỽc a|r morynyon ymeith. yny|doethant y
ymyl y casteỻ coch. a|r casteỻ hỽnnỽ a|oed wedy y damgylch+
ynu o bedeir fforest. ac nyt oed yno neb o vyỽn y casteỻ. a ̷
pharth ac yno yd|oed yn|eu|bryt vynet y lettyu. pan gyfar ̷+
vu ac ỽynt gỽas yr hỽnn a|dywaỽt ỽrthunt nat oed yno neb.
Ac yna ỽynt a aethant racdunt yny doethant y ystlys fforest
yn|y ỻe yr oed ỻawer o|bebyỻeu wedy|r dynnv myỽn ỻannerch
deckaf o|r a|welsei neb eiryoet. Ac yd|oed y|pebyỻ yn parhau
viỻtir. Ac yna y|doethant o vyỽn y pebyỻ. Nyt oed yn|y byt
ỻewenyd vỽy noc a|oed yno. A|phan|doethant ỽy y myỽn. ỽynt
a|welynt yno amylder o vorynyon a gỽraged tec. Yna ef
gymerwyt y marchaỽc briwedic ar lewenyd. ac a|diosget
y arueu. ac a edrychỽyt y vriỽ. a gỽedy daruot y olchi a|e
iro. ef a|ducpỽyt idaỽ diỻat o|e gỽisgaỽ. A gỽedy a|e dugas+
sant geyr bronn yr arglỽydes. yr honn a|wnaeth idaỽ lewennyd
maỽr.
| « p 171v | p 172v » |