Breudwd Welsh Prose 1300-1425
Cymraeg

NLW MS. Peniarth 11 – page 181v

Ystoriau Saint Greal

181v

Arglỽyd heb ynteu pettei ef heb gysgu efo a|e dywedei ytt. Ac
yrof|i nys gỽybydy di. A|a ynteu yrhaỽc odyman heb y brenhin.
Efo a|a y|r neuad racko yn gyntaf heb ynteu. a|ỻawen vu y bren  ̷+
hin am hynny. a|mynet ymeith a|oruc. ac y ystaueỻ y vrenhi  ̷+
nes y doeth. a|dywedut a|oruc ef idi y damchwein. ~  
A C yna y vrenhines a gyuodes a|dỽy o|e morynyon ygyt
a|hi. ac a|doethant y|r neuad. ac ar hynny ỽynt a|welynt
y marchaỽc yn|dyuot a|e gledyf yn noeth yn|y|laỽ. Arglỽyd ~
heb y vrenhines. grassaỽ duỽ wrthyt. ỻewenyd ac antur da
a|rodo duỽ y|ttitheu heb ynteu. Arglỽyd heb hi. os da gan duỽ.
nyt reit ym vn argysswr ragot ti. Y brenhin yna a|e gỽeles.
ac a|weles y bitheiat yn neityaỽ yn|y gylch. ac yn gỽneuthur
ỻewenyd maỽr idaỽ. Ac yna y|marchaỽc a gymerth y daryan
y ar y golofyn. ac a|roes yr eidaỽ ynteu ar y golovyn. ac a|do+
eth tu a|drỽs y neuad. Yna y brenhin a dywaỽt ỽrth y vrenhi+
nes. Gỽedia y marchaỽc ar nat el odyma mor ehegyr a|hynn.
arglỽyd heb y marchaỽc ny chaf|i o ennyt trigyaỽ hỽy no
hynn. Eissyoes ti a|m gỽely i yn ehegyr. Drỽc a|doluryus
vu gan y brenhin a|r vrenhines idaỽ vynet. ar hynny y mar+
chaỽc a|doeth tu a|r ỻong. a|r bitheiat a aeth yn|y ol. Ac|yna
meistyr y ỻong a|dynnaỽd y bat attaỽ. ac a|gyuodes hỽyl
ar y ỻong ac a|aethant y|r more. Y brenhin yna a|drigyaỽd ~
ym pen vesius. yn|drỽc ganthaỽ vynet y marchaỽc ymeith
ac ef a|wybu ac a adnabu panyỽ paredur oed. Y marchogy+
on urdolyon yna a|gyuodassant y vyny. pan y gỽelsant ~
yn dyd. ac a|glywssant vynet y marchaỽc a|r|daryan ganthaỽ.
a|drỽc vu ganthunt nas gỽelsant. Yna yr vnbennes a|doeth