NLW MS. Peniarth 11 – page 254v
Ystoriau Saint Greal
254v
honat heb vyng|kennat i heb hi. A mi a vum yma yn gỽarch+
adỽ y ỻe|hỽnn a|r capel yr ys talym. ac am hynny dywet ym dy
henỽ. A vnbennes heb·y laỽnslot beth a|enniỻy di yr gỽybot
vy henỽ i. Nys|gỽnn heb hi beth vyd ym hynny ae enniỻ ae
coỻet. namyn mi a|weleis amser y govynnỽn i dy henỽ di
yn anhegarach ytt. A vnbennes heb ef. ef a|m gelwir laỽnslot
dy lac. Gan hynny heb hi ti a|dylyy gael y cledyf a|r amdo.
a chanys kefeist dabre y·gyt a|mi y|m casteỻ. kanys mi a|th
damuneis lawer gỽeith ti a|pharedur a gỽalchmei. a dabre
di ygyt a|myui a|thi a|wely y teir ysgrin a|bereis eu gỽneuthur
ar aỽch medyr chỽi aỽch|tri. A vnbennes heb·y laỽnslot ny
mynnaf|i welet vy med mor ehegyr a|hynn. Myn vym|penn i
heb hi ony deuy di nyt ey odyma ual y teby·gy. kanys y rei
a|wely di racko dieuyl daearaỽl ynt yn gỽarchadỽ y vynnwent
honn ac ỽynt a|wnant vy ewyỻys i. Os da gan duỽ heb·y la+
ỽnslot nyt reit y gristaỽn ovyn dy dieuyl|di. Och laỽnslot
heb hi mi a archaf ytti yr|duỽ dyuot ygyt a|mi y|m casteỻ. a
mi a|th amdiffynnaf di yma o|th eneit a|t* |gorff. ac ony mynny
di wneuthur hynny dot y cledyf a|r amdo yn|y ỻe y kefeist. a
dos ỻe y mynnych. A vnbennes heb·y laỽnslot y|th gasteỻ di nyt
af|i ac ny mynnaf vynet. ac na arch ym hynny mỽy. kanys
y mae ym negesseu ereiỻ y|ỽ gwneuthur. na|r cledyf nys rodaf
inneu y ỽrth·yf yr a|del ym. kanys y mae yn glaf marchaỽc
a|dyly bot yn iach o·blegyt y cledyf hỽnn. yr hỽnn a vydei varỽ
ony|s caffei
| « p 254r | p 255r » |