NLW MS. Peniarth 11 – page 91r

ỽynt. yd oed y|bobyl o|r|dref ac o|r|casteỻ yma yn waeth no sarascinye+

it. Ac ny wneynt dim onyt yn erbyn duỽ a|r eglỽys. Arglỽyd heb+

y galaath yd oed yn|ediuar gennym ni gỽneuthur hynny. Nac e  ̷+

diuaret vyth arnat heb yr offeiryat. a mi a|rodaf vy ỻỽ ytt y kef+

fy diolỽch gan|duỽ. kanys gỽaethaf pobyl oedynt. a mi a dyw+

edaf ytt pa|ffuryf yd|oedynt ueỻy ~ ~ ~  

A R y casteỻ hỽnn yd oed yn|arglỽyd gỽr a elwit ernỽlff. ac

yd oed idaỽ dri|meib yn wyr grymus o arueu. ac vn uerch

a|oed idaỽ deckaf yn|y byt. a|e thri broder a|e karaỽd yn gymeint

ac y gỽnaethant gỽeithret uffernaỽl a|hi yn erbyn y hewyỻys

hi. ac am gỽynaỽ ohonei hi ỽrth y that. ỽynt a|e ỻadassant hi.

A|phan|weles eu tat ỽy hynny ef a geissyaỽd eu gyrru ỽy yme+

ith y ỽrthaỽ. ac ny diodefassant ỽy hynny namyn ỽynt a gyrchas+

sant eu tat ac a|e ffustassant yn|drỽc. ac a|e ỻadyssynt yn uarỽ

pany bei vraỽt idaỽ a|lesteiryaỽd arnunt. a gỽedy daruot u+

dunt hynny ỽynt a|wnaethant y drygeu mỽyhaf ac a aỻys+

sant. ac a|ladyssant yscolheigyon ac offeiryeit a myneich. ac

vỽryassant y|r ỻaỽr yr eglỽysseu a|r capeleu. ac a|wnaethant o dry+

geu gymeint ac y|mae ryued na|s|ỻyngkaỽd y dayar ỽynt yr ys

talym. a|r bore hediỽ yd anuones eu tat ỽy gennat attaf|i y dy+

wedut y uot yn agos y varỽ. ac y erchi yr duỽ y minneu dyuot

o|e gymunaỽ. a|minneu a|deuthum yn ỻawen. kanys kedym+

deith oedyỽn idaỽ yr ys talym. a phan doethum y myỽn ny aỻei

sarascinyeit wneuthur ym o|gewilyd mỽy noc a|wnaethant.

a minheu a|diodefeis hynny. a phan doethum y|r carchar ỻe

yd|oed y gỽr da. mi a|dywedeis idaỽ y kewilyd a|wnathoed y