NLW MS. Peniarth 15 – page 133

y gwedieu hi. Ac yn eu kadỽ yn|y challon yn hyspys gofadỽyr

Ac yna yn dissymỽth yd ymdangosses idi o gegyl* yn karchar dreic

aruthyr amliỽ a|e wallt a|e varyf mal yn eureit a danhed heirn

idaw A|e legeit megys gemeu yn disgleirraỽ. Ac o|e ffroeneu

mwc a|than yn kerdet. A|e tauaỽt oed tanỻyt ygkylch y war a|e vy+

nwgyl. A chledyf gwynias yn|y laỽ. Ac arogleu drỽc a brynti

a wnaeth yn|y karchar a garmleis gadarndost a dodes ef A|than

o e safyn a oleuhaỽd yr hoỻ karchar Ac ofyn praf a gymerth

margret santes pan weles hynny a glassu mal glasweỻtyn. a chryt

a kymerth mal dyn ym vron* agheu a|chrynu a|wnaeth y hoỻ escyrn. Ac

ny doeth cof idi rac meint y hofyn clybot o duỽ y gwedi. a|e vot yn dan+

gos idi y gelyn a oed yn ymlad a|hi. kanys hynny a dylygassei*. ar y

gwedi. Ac eissoes dygỽydaỽ a oruc ar ben y deulin y|r ỻaỽr a drecha+

uel y dỽylaỽ ẏg|gỽedi ar duỽ A|dywedut val hyn. Duỽ ny eỻir y|we+

let a|ỻygeit knaỽtaỽl y neb y cryn yr egaỽn racdaỽ y neb a gadarnhaus

y paradỽys. Ac a ossodes teruyneu y|r moroed. ti a yspeileist uffern ti

a oruuost ar y kythreul. Ac a|wercheeist y dryeic* vaỽr aruthyr

edrych ti arnaf|i a thrugarhaa ỽrthyf Ac na at y|r aghynuil|hỽn

argewedu* imi. yr hỽn yssyd heb ohir yn keissaỽ vy ỻynku. A|thra

yttoed hi yn dywedut hynny y dreic a|e safyn yn|y ỻet a|e kyrch+

aỽd. Ac a dygỽydaỽd erni ac a|e ỻyncaỽd. Sef a|wnaeth arỽyd

y croc a dodassei hi erni tyffu* yng|geneu y dreic vỽyuỽy hyny

holltes ef yn deu gelỽrn. a chywynnu a oruc y gogenedus vargret y

vynyd yn didrỽc di awengoel*. A chyt a|hynny edrych a oruc Mar+

gret ar y ỻaỽ asseỽ idi. A hi a welei diafỽl araỻ a|e dỽylaỽ yn rỽ+

ym ar dal y deu·lin A phan weles hi y kethryul hỽnnỽ veỻy. Gwediaỽ

a oruc hi val hyn. a|dywedut ỻawen ỽyf|i a gorvoledus arglỽyd

duỽ. colofyn ffyd iessu grist brenhin diuaruaỽl creaỽdyr doeth a

dechreu y aneiryf o seint. Ac o eggylyon* grỽndwal kadarn yr

hoỻ defnydyeu. yr aỽr·hon y gwelaf|i vyg|gret yn blodeuaỽ yr

aỽr·hon y gwelaf ỻewenyd vy eneit. ỻyma vi yn gwelet y

dreic coch gỽydy bỽrỽ dan vyn traet y|r ỻaỽr. ỻyma y dryc+

wynt a|e vrynti gwedy yr enkil. Mi a welaf y wenỽyn ef a|e

gyndared yn enkil ragof|i. Ac yn trỽy* idaỽ ef drachefyn. Mi

a welaf arwyd y groc y* blodeuaỽ. Mi a welaf vyng|corff. a