NLW MS. Peniarth 18 – page 21v
Brut y Tywysogion
21v
derch idaỽ. a|e vn verch a|llaỽer o|ỽyr maỽr gyt
ac wynt. ac o wraged arbennic am·gylch deu cant.
Y rei a|tybygit y bot yn deilyghaf. o garyat plant
y brenhin. ac ef a|rodet vdunt. y llog oreu a|dio+
gelaf a|odefei y|mordonneu ar morolyon dymhes+
tloed. a|gỽedy eu mynet yr llog dechreu nos dir+
uaỽr gyffroi a oruc y mordonneu drỽy eu kymhell
o dymhestlaỽl vordỽy a|dryc trum. ac yna y|kyf+
aruu y|llog a chreigaỽl garrec a oed yn dirgel
dan y tonneu heb wybot yr llogỽyr. ac y torres
y llog. genti yn drylleu. ac y bodes y meibon.
a|phaỽb o|r nifer a oed ygyt ac wynt hyt na die+
gis neb o·nadunt. ar brenhin a|ysgynnassei myỽn
llog arall. yn|y hol a|chyt kyffroit o|diruaỽryon
dymhestloed y|mordonneu eissoes ef a|diegis yr
tir. a|phan gigleu ry uodi y veibon drỽc y|daeth
arnaỽ. ac y|ghyfrỽg hynny y|teruynnaỽd y|ulỽ+
ydyn honno. Y vlỽydyn racwyneb y priodes he+
nri urenhin. verch nebun tewyssaỽc o|r almaen.
kanys kyn no hynny wedy marỽ merch y moel
cỽlỽm y ỽreic yd|aruerassei yn wastat o ordercha+
deu. a|phan doeth yr haf racỽyneb y|kyffroes hen+
ri vrenhin diruaỽr greulaỽn lu yn erbyn gỽyr
powys. nyt amgen Maredud vab bledyn. ac ei+
naỽn ap Madaỽc. a Morgan. Meibon cadỽgaỽn ap
bledyn. a|phan glyỽyssant ỽynteu hynny anuon
| « p 21r | p 22r » |