NLW MS. Peniarth 190 – page 129
Ystoria Lucidar
129
ac agos vyd idaỽ bop peth kyfyaỽn tec. kanys
duỽ a|dichaỽn atgyweiraỽ pob aelaỽt. yn|y le. discipulus.
Beth am y rei y|bu yma deubenn neu vỽy no
dylyet o|aelodeu ereiỻ arnunt. neu yn guly+
on. neu yn vreisgon ae val|hynny y kyuodant
ỽy. Magister Pỽy bynnac yman y bu deu benn arnaỽ
deu gorff a|gyuyt idaỽ. ac eneit ympob corff.
ac ny byd dim anwedeid na|dybryt arnaỽ.
kanys hoỻ·iach a|chyfyaỽn vydant. a chyfla+
ỽn o bop tegỽch. discipulus Beth a|synny di am y rei
erthyl. Magister A berthyno ar|hat y tat yn|y tat y
kyuyt. ac a|berthyno y|r vam yn|y vam y ky+
uyt. discipulus Pa ryỽ gorfforoed a|vyd udunt ỽy. Magister|Rei
an·uarỽaỽl di·lỽgyr a|gloewach no|r gỽydyr
gỽynn a|vyd y|r seint. Y|r rei drỽc y|byd kyrff
anuarỽaỽl heuyt doluryus o angheu heb
deruyn vyth. a ỻygredic vyd a hynny o bop
ryỽ boen arnunt ny eỻir eu treulaỽ. a|thyỽ+
yỻ angheu udunt. discipulus Pa|aỽr y byd y vraỽt. Magister
Hanner nos yr aỽr y distrywaỽd yr angel yr
eifft. ac yd yspeilaỽd yr arglỽyd uffern. yr
aỽr honno y rydhaa ynteu yr etholedigyon o|r
| « p 128 | p 130 » |