NLW MS. Peniarth 32 (Y Llyfr Teg) – page 183
Llyfr Iorwerth
183
O|deruyd. bot deu·dyn yn kytgerdet. a chaffel doouot
o|r blaenhaf; ranhet yn deu hanner a|r olaf.
Os yr olaf a|e keiff ynteu; ny dyly y blaenhaf
dim; kan ymadaỽssei ac ef O|deruyd. y vraỽt adei+
lat ymlaen y ỻaỻ; ny dyly kychwyn o|r ỻe yd
adeilho; namyn rodi y|r ỻaỻ tu a thal yn ỻe
hỽnnỽ. Sef yỽ tu a thal. ỽrth ystlys neu ỽrth
dal y tir y bo y ỻaỻ yn eisted arnaỽ. ac ony
byd tu a|thal yna; kyfranher ac ef. ỽrth nat
reit idaỽ ef vynet odyna ony|s|myn. O|deruyd. y
radwr wneuthur kam y dyn araỻ; kymerer
iaỽn y ganthaỽ mal y gan dyn araỻ. O|deruyd. y
radỽr kaffel cam y gan leyc; diwycker idaỽ
ỽrth vraỽt yr eglỽys. o·nyt y agheu a|daỽ o|r
cam. Os hynny a|deruyd; diwycker y|r eglỽys
y gỽarthrud a|e sarhaet. a thaler y|r genedyl
y alanas. Messur gỽiraỽt kyfreithaỽl yỽ; ỻoneit
y ỻestri y gỽaỻofyer ac ỽynt o|r kỽryf. ac
eu hanner o|r bragaỽt. ac eu traean o|r med.
Messur ỻetgaỽd yỽ; kyfuch a chygỽng yr
ewin y|r bys nessaf y|r vaỽt. Ny dylyir talu
tỽng o|dir kyfrif. Sef achaỽs yỽ; ỽrth na
dylyir rodi kỽynos o·honaỽ Kylch kỽn a
meirch a dofreth a dylyant ar dref kyfrif.
ac ỽrth hynny ny dylyant borthi arglỽyd
o·honei Ny|dyly neb talu gỽeithret ỻetuegin.
| « p 182 | p 184 » |