NLW MS. Peniarth 32 (Y Llyfr Teg) – page 49
Llyfr Iorwerth
49
1
assỽ ar galy y gỽr. a|r ỻaỽ deheu ar y creireu.
2
a|thygu o·honei hitheu y|r creireu hynny. ac
3
y duỽ yn|y blaen y vot ef genthi hi a|r galy
4
honno y dreis y arnei. a|e gỽneuthur o vorỽyn
5
yn wreic. a|gỽneuthur meuyl a sarhaet a|chew+
6
ilyd idi ac o|e harglỽyd ac o|e chenedyl. Yna y
7
dyweit rei bot yn eir y geir yna ar y gỽyrdaỽt.
8
ac na eỻir gỽadu yn erbyn hynny. Ereiỻ a|dywe ̷+
9
it nat oes vn treis ny aỻer y wadu. ac y dyly
10
ynteu wadu y treis hỽnnỽ o lỽ degwyr a|deugeint
11
heb aỻtudyon. Ot adef ynteu treissaỽ morỽyn;
12
talet dirỽy y arglỽyd y wlat. a|e hamobyr o|e
13
harglỽyd hitheu e|hun. ac idi hitheu y chowyỻ
14
a|e sarhaet a|e hagwedi a|e dilysrỽyd. O dygir
15
treis ar wreic wryaỽc; ny dylyir talu y hamobyr.
16
kanys hi e|hun a|e talaỽd pan wrhaaỽd. O deruyd
17
y wreic dỽyn mab yn gyfreithaỽl y wr. kyt as
18
gỽatto y gỽr. kyfreith. a|dyweit gỽedy as|dycco hi euo
19
vnweith y|wr yn kyfreithaỽl; na eiỻ y dỽyn y araỻ
20
vyth. ac na byd kardychwel y wrth y neb y duc+
21
pỽyt idaỽ yn|gyntaf. O deruyd. rodi gỽreic y|wr; ac
22
enỽi da genthi. a|chaffel kỽbyl hyt yn oet vn
23
geinhaỽc. ac na chaffer honno. kyfreith a|dyweit
24
y geỻir yscar a|hi am honno. ac na chaffo dim o|r ̷
25
eidi. a honno a|elwir un geinhaỽc a|dỽc cant. Nyt
26
reit mach ar da a|del y gan wreic yg|kanyscaeth.
« p 48 | p 50 » |