NLW MS. Peniarth 46 – page 278
Brut y Brenhinoedd
278
llosgedic o|neỽyd. ac y|peris gossot gỽassana+
ethỽyr yn|yr eglỽysseu yn herỽyd y|lan ffyd.
a|r dylyedogyon a|r daroed y|r saesson eu diỽre ̷+
idaỽ. gossot paỽb ohonunt yn|y dylyet o|gỽbyl.
A C ynyo* yd oedynt tri|broder a|hanhoe ̷+
dynt o|urenhinaỽl dylyet. Sef oedynt
hỽy. lleu uap kynuarch. ac uryen uap
kynuarch. ac araỽn ap kynuarch. a rei h
hynny a|dylyei tyỽyssogaeth y gỽladoed h
hynny. ac a|oedynt yndunt kynn dyuot
y saesson. ac yna y|rodes arthur y|araỽn
uap kynuarch urenhinaeth yscotlont.
ac y|leu uap kynuarch iarllaeth lodneis
ac a|perthynei ỽrthi. canys yr yn oes e+
mreis ỽledyc y|rodyssit anna chỽaer y ar+
thur yn ỽreic y leu uap kynuarch. yr
honn oed uam ỽalchmei. a|medraỽt. ac y
rodes y uryen uap kynuarch reget dan
y|theruyneu. a gỽedy daruot lluneithaỽ
pob peth. a|dỽyn yr ynys ar|y|hen teilygda+
ỽt. a|rodi y|baỽp y|dylyet y kymerth y|bren+
hin ỽreic a|hanoed o|dylyedogyon rufein
| « p 277 | p 279 » |