NLW MS. Peniarth 46 – page 285
Brut y Brenhinoedd
285
a galỽ attaỽ holl yscolheigyon freinc. a|e lleycyonn.
o|r a dylyei y|galỽ. ac yna y|rodes arthur y vedỽyr
y benntrullyat iarllaeth normandi. ac y gei
y bennn sỽydỽr iarllaeth angỽy. ac y|r gỽyrda
ereill oed yn|y ỽassanaeth y|gỽladoed ereill
yg·kylch hynny. ac uelly gỽneuthur paỽp yn
uodlaỽn. a|phann ydoed y gỽanhỽyn yn|dyuot
y|doeth arthur y ynys prydein.
A |Gỽedy y|dyuot y. ynys. prydein. darparu a|ỽna+
eth trỽy leỽenyd daly llys yn. ynys. prydein.
a|gỽiscaỽ coron teyrnnas. a galỽ paỽb
attaỽ o|r brenhined. a|r tyỽyssogyon a|oresgynassei.
y|r|ỽled honno. a|r|sulgỽyn oed yr amser hỽnnỽ.
ac aruaethu a|oruc y|haruoll yn anrydedus. ac at+
neỽydhau tagneued yrydunt trỽy yr holl te ̷+
yrnnas. ac y|cauas yn|y gygor ỽneuthur y|ỽled
honno yg|kaer llion ar|ỽysc y|gỽlat uorgant.
canys teckaf lle oed hỽnnỽ yn. ynys. prydein. a|chyuo+
ethoccaf o eur. ac aryant. a|daoed ereill. ac a+
dassaf y|gynnal y|ryỽ ỽylua honno. Canys o|r
neilltu y|r|dinas yr oed yr auon uonhedickaf yn
arỽein y|llogeu a|r|brenhined yndunt o|bedyr ̷ ̷+
| « p 284 | p 286 » |