NLW MS. Peniarth 46 – page 298
Brut y Brenhinoedd
298
ac ỽynt. medlys aỽelioed uydei y|rei hynny.
tra uydỽn yn|dial gỽaet uy ryeni. ac yn am ̷+
diffyn an rydit ac yn gỽlat. ac yn dyrcha+
uel an brenhin. ac ychỽaneckau dy lu tith ̷+
eu arglỽyd y|hynny. mi a rodaf dỽy uil o
uarchogyon aruaỽc hep y|pedyt. a|gỽedy
daruot y|baỽp dyỽedut y|dull adaỽ a|ỽnaeth
paỽb herỽyd y gyuoeth a|e allu y|niuer goreu
a allei y arthur. ac yna y caffat o ynys. prydein. hep yr
hynn a|adaỽssei hyỽel ap emyr llydaỽ. tri uge+
in mil o|uarchogyon aruaỽc. ac o|r ynyssed
nyt amgen. Jỽerdon. ac islont. ac godlont.
ac orc. a llychlyn. a|denmarc. y|riuỽyt o|bedyt
deugein mil. canyt oed aruer marchogyon gan+
tunt. ac o|ffreinc. nyt amgen. rỽytỽn. a nor+
mandi. a|pheittaỽ. ac angỽy. y|riuỽyt pedỽ+
ar|ugein mil o|uarchogyon aruaỽc. ac y|gann
y|deudec gogyuurd o|freinc y|riuỽyt. deucant
a|mil o|uarchogyon aruaỽc. Sef oed eiryf
hynny oll ygyt. Deucant. a|their mil a|phedỽ+
ar|ugein mil. a|chan mil o|uarchogyon hep y
pedyt. yr hynn nyt oed haỽd eu gossot ynn ̷
| « p 297 | p 299 » |