NLW MS. Peniarth 9 – page 41r
Ystoria Carolo Magno: Can Rolant
41r
ythet efferenneu a|chyghoreu dỽywaỽl. Ac nat
ymyrret neb o·honaỽch ar wassanayth y gilid.
namyn etholỽch ym ỽr prud dosparthus a we+
do idaỽ godef poys* y neges honno. Ac yno y
deuth cof y rolond aghanmaỽl o wenwlyd y
kyghor. Ac y dywaỽt ynteu na well y wedei
neb yr neges honno noc y wenwlyd. Dychy+
mic rolond yna a gan·molet. a dywedut o ba+
ỽp val y dywedyssei rolond am wenwlyd. Ac
yna y dywaỽt charlymayn. Ayt ynteu yr ne+
ges honno. A damwein yỽ methu neges a uo
kanmoledic gan paỽb. Rolond heb y gỽen+
wlyd a beris imi vynet yr neges hon. Ac ys+
syd yn keissaỽ vy niua i. Ac o hyn allan mi
a vydaf agedymdeith idaỽ val y gỽypo. A mi
a|y agkan·molaf gan y gywiraỽ. nat a y vlỽyd+
yn hon heibaỽ yn gỽbyl nes dial y enwired ar
y neb a|beris y dychymic hỽn. Gỽynwlyd
heb y rolond ry|baraỽt ỽyt y lidyaỽ ac nyt gỽe+
dus goruot o dryc annyan ar gỽr namyn bot
yn drech y gỽr no|r dryc anyan a gỽna di y
neges a orchymynỽyt yt o anryded y gor+
chymynnỽr. Ac nac edrych ar neb tra vych
yn ymdidan a charlymayn. namyn ar char+
hymayn y hun. Mi a vydaf vfyd arglỽyd
yr hyn a orchymynnych di ac a erchych y mi
heb y gỽenwlyd. ac a af ar varsli ac ny obeith+
af o|m heneit mỽy no basin a basil a peris y
pagan hỽnnỽ eu diwetha. A rolond a uu kyg+
| « p 40v | p 41v » |