Cardiff MS. 1.363 (Hafod 2) – page 44v
Brut y Brenhinoedd
44v
a pheydyaw a wnaeth ar dryc·deỽodeỽ a|wu+
essynt arnaw gynt. ac o·dyna allan anrydedỽ
y bonhedygyon ar dyledogyon ac estwng
yr rey andyledaỽc a|thalỽ y paỽb y dylyet.
ac o|r dywed y bu varw ac yg kaer llyr e cladwyt.
AC yna yr ey·lweyth yd etholet elydyr
yn ỽrenyn. Ac eyssyoes hyt|tra ydoed ef
yn erlyt gweythredoed a deỽodeỽ Gorỽynya+
ỽn y ỽraỽt ef yr hynaf yn holl daeony. y|deỽ
ỽroder yeỽhaf ydaw. Jỽgeyn a pheredỽr a k+
ynnỽllassant llw maỽr arỽaỽc o pob parth
ac a dechrevassant ymlad ac ef. Ac gwedy ar+
ỽerỽ ohonỽnt o|r wudỽgolyaeth wynt a da+
lyassant elydyr war ac a|e carcharassant ef
ym meỽn twr yg kaer lỽndeyn. a gossot keyt+
weyt o|y kadw. Ac odyna yr rannassant hw+
yntev y teyrnas yn dwy rann yr·rygthỽnt.
Ac ysef y dygwydws yr ran Jỽgeyn o hỽmyr hyt
y gorllewyn. sef yw hynny. lloegyr a chymry. a
chernyw. Ac yn rann peredvr y dygwydvs o hỽ+
myr hvnt y gogled ar alban oll. Ac gwedy llyth+
raỽ seyth mlyned marỽ wu Jỽgeyn ar teyrnas h+
oll a dygwydỽs yn llaỽ peredỽr. Ac gwedy y ỽot
yn ỽrenyn ar kỽbyl o ynys prydeyn ef a|e|llywyaỽd
| « p 44r | p 45r » |