NLW MS. Llanstephan 27 (The Red Book of Talgarth) – page 29r
Ymborth yr Enaid
29r
1
draỽd yỽ. dywedut geiryeu gỽamalyon di·ystyr. drỽy orwac+
2
rwyd seguryt. anniweirdeb glythineb yỽ. ardangos ar arỽy+
3
dyon odieithyr trachwant y medỽl o vyỽn y lythineb. anad+
4
vỽynder yỽ. keissyaỽ gormod anregyon o vỽyt blyssic. neu
5
ormod o|diodyd gỽerthuaỽr·ussyon. an·hynaỽster yỽ. aruer
6
o|dragormod werthuaỽrussyon wisgoed am y gnaỽdaỽl ~
7
gorff. Tordein yỽ. tra·gorthrymder y gaỻon gan ormod
8
destlusrỽyd. Chwyt yỽ kymryt gormod bỽyt neu diaỽt
9
yny orffo y etvryt drachefyn gan y chwydu. ~ ~ ~
10
T Raether beỻach am irỻoned a|e geingeu. Jrỻoned
11
yỽ. ỻidiaỽcsor* gỽenỽynicuar ỽrth araỻ drỽy ewyỻys+
12
chwant. kael deissyvyt dial am y lit. Pedeir|keing ar|dec
13
yssyd y irỻoned. nyt amgen. cas. annuundeb. kynnen. ym+
14
wychaỽ. an·odef. ymserthu. maỽrdryged. enwired. dryc·ewyỻys
15
kyndared. tervysc. dryc·anyan. ỻovrudyaeth. Cas yỽ blinder
16
medỽl am araỻ o hen dryc·anyan. annuundeb yỽ ymwaha+
17
nu o|r rei a|notteynt ymgaru. Kynnen yỽ sarhaet ar eiryeu
18
megys ymchwyrnu. Sarhaet yỽ. gỽneuthur cam ac araỻ ar
19
eir neu weithret yn anghyfreithyaỽl. Ymwychaỽ yỽ ymsarhau
20
drỽy ymserthu ar eireu kodedigyon. an·odef yỽ. an·wahard
21
teruysgus wyỻtineb medỽl heb y dofi. Ymserthu yỽ. ymdorri
22
deissyfyt gyffro medỽl y|myỽn an·advỽynyon ymadrodyon
23
serthyon. Maỽrdryged yỽ. dicheỻus ystryỽ y goỻedu araỻ. En+
24
nwired yỽ. beidyaỽ drỽy drudannyaeth gỽneuthur drỽc y
25
araỻ kynny aỻer. Dryc·ewyỻys yỽ. ry buchaỽ drỽc y araỻ kyn+
26
ny aỻer ar weithret. Kyndared yỽ. coỻi synnwyr o draỻit. ~
27
Teruysc neu gynnỽryf yỽ. anwastatrỽyd ỻithredic gnaỽdolyaeth
| « p 28v | p 29v » |