NLW MS. Llanstephan 27 (The Red Book of Talgarth) – page 89r
Mabinogi Iesu Grist
89r
phan yttoed Joseph yn diwethaf oỻ. Jzachar escob a|elwis ar+
naỽ yn uchel. Dyret yma heb ef. a chymer dy wialen. kan+
ys tydi yd ym ni yn|y aros. Joseph a nessaaỽd yn ofynaỽc am
alỽ o|r esgob yn uchel arnaỽ. a|r aỽr y rodes Joseph y laỽ ar y
wialen. yd ehetaỽd colomen wynnach no|r|eiry o vlaen y wialen.
a gỽedy ehedec rynnaỽd o·honei y nenn y demyl yd aeth y|r
nef. Ac yna y hoffes yr hoỻ bobloed hynt yr henỽr hỽnnỽ. gan
dywedut. gỽynuydedic ỽyt heb ỽynt y|th heneint. kanys duỽ
a|th dangosses yn aduỽyn y gymryt meir. A phan|dywaỽt yr
offeiryeit ỽrthaỽ yr ymadraỽd hỽnn. kymer veir heb ỽynt. ka+
nys duỽ a|th etholes o|r hoỻ bobloed ac o|r hoỻ lỽyth o|e chadỽ.
Joseph yna a|e gỽediaỽd ac a|dywaỽt ỽrthunt yn gewilydyus.
Hen ỽyf|i heb ef a meibyon yssyd ym. a phaham y rodỽch chỽi
y mi y uerch uechan honn. yr honn o oet a|aỻei vot yn wyr y
mi. a ỻei yỽ noc un o|m hỽyron. Abizachar esgob uchaf a
dywaỽt yna. dattan ac abiron a|dremygaỽd gỽneuthur ew+
yỻys duỽ. ac am hynny y daear a|e ỻyngkaỽd ỽynt. agat+
uyd ys deruyd y titheu y kyfryỽ os|tremygy. yr hynn a uynn
ef ytti y wneuthur a wney. Joseph a|e hattebaỽd ef yna. Ny
thremygaf|i heb ef ewyỻys duỽ. namyn mi a vydaf geitwat
arnei hyt tra|vynno duỽ vy mot. Roder heb ef rei o|r gỽerydon
y chedymdeithesseu o|e chanlyn. abizachar a|e hattebaỽd y+
na. Hi a geiff heb ef rei o·nadunt yn didanỽch udunt yny
del y|dyd y kymerych di hi. ac yna Joseph a gymerth meir
a phump o|r gỽerydon y·gyt a|hi. ac a|doethant y ty ioseph.
Enweu y gỽerydon hynny oed. Rebecka. Serora. Susanna.
abizena. Sael. Yna y rodes yr esgob udunt. syndal. a sidan.
| « p 88v | p 89v » |