NLW MS. Llanstephan 4 – page 21v
Buchedd Dewi
21v
ac ynteu a rodes yr vn atteb a rodassei
gynt. a|r dryded weith o gyttundeb yr|hoỻ
seint yd anuonet att dewi yn|gennadeu y
deu sant bennaf a|oed yno. nyt amgen. deiny+
oel a|dubricius. a|r nos kynn dyuot y ken+
nadeu att dewi. dewi a|dywaỽt ỽrth y dis+
gyblon. vy meibyon i gỽybydỽch chwi y
daỽ kennadeu yman auory. Eỽch y bysgot+
ta y|r mor a dygỽch yma dỽfyr gloeỽ o|r
fynnaỽn. A|r|kennadeu a|deuthant y dyd
y dywaỽt dewi ỽrthunt. ac ynteu a ba+
rattoes udunt ỽy eu kinyaỽ. Disgyblon
dauyd a rodassant ar y bỽrd rac bronn y
seint pysgaỽt digoned a|dỽfyr o|r|fynna+
ỽn. a|r dỽfyr a aeth yn|win ar hynt. A
dauyd a dywaỽt ỽrthunt. bỽytteỽch vro+
dyr yn ỻawen. Ac yna y dywaỽt y deu
sant ỽrthaỽ ef. Ny chymerỽn ni na bỽyt
na diaỽt heb ỽy onyt edewy ditheu dy+
uot y·gyt a ninneu y|r sened vaỽr enry+
ued y ỻe y mae ỻu ny eỻir eu rifaỽ y|th
aros di. wrth hynny heb ỽynt dabre y+
gyt a|ni yr|duỽ ac yr bendith hynny o
seint o·ny mynny haedu eu hemeỻtith.
Heb·y dewi yna. Mi a|af heb ef yr karyat
duỽ att y kedymdeithyon hynny. Eissyoes
| « p 21r | p 22r » |