NLW MS. Peniarth 11 – page 162r
Ystoriau Saint Greal
162r
ac ef a|m kymhorthes i amdiffyn vy eneit. A minneu a|e di ̷+
olchaf y|ttitheu herỽyd ual y gaỻwyf y kỽrteissi hỽnnỽ. Arglỽyd
heb y marchaỽc os marỽ vu ef. maỽr a ovit yỽ hỽnnỽ ymi. ka ̷+
nys mi a|goỻeis vy ỻewenyd a|m|kynheilyat. a|thref vyn
tat. ac y·gyt a|hynny heb obeith o|e gael vyth. Arglỽyd heb+
y laỽnslot efo a|m kymhorthes i am gael vy eneit. Minneu
a|th gymhorthaf ditheu am gael dy dir. A|phan gigleu ef yn
hyspys varỽ y vraỽt. ef a dechreuaỽd dryckyssyryo yn gym+
eint ac na aỻei neb y didanu. Peit heb·y laỽnslot a|th d
dryckyssyryo ueỻy. a goỻỽng hynny beỻach dros|gof. a|mi
a rof vyng|corff a|m milỽryaeth drossot ti ym|pop ỻe o|r y bo
reit ytt ỽrthyf. Arglỽyd heb y marchaỽc duỽ a|dalo ytt dy
garyat am gynnic ym dy wassanaeth. kanys reityach yỽ
ym yr aỽr·honn noc eiryoet. Myn vyng|cret heb·y laỽnslot
myui a|af y·gyt a|thydi fford y mynnych. ac|a|rodaf vyng
corff drossot ym|perigyl o|r byd reit ytt. yn gyn|hyttret ac y
rodes ynteu drossof|inneu. ~
M archogaeth yna y·gyt a|wnaethant yny doethant
y|r corsyd. Ac ar|hynny nachaf gasteỻ a|r greic yn
ymdangos udunt. a gỽeirglodyeu tec y·danaỽ. Arglỽyd
heb y marchaỽc ỽrth laỽnslot. y casteỻ racko a|vu eido vy|mra+
ỽt i. a|r marchaỽc a|e|duc ef y ganthaỽ yssyd gyn greulon+
et. a|chyn hyet o|e gorff. ac nat oes arnaỽ ovyn neb o|r|byt.
a|thi a|e gỽely ef yr aỽrhonn yn dyuot aỻan yr|aỽr yr|argan+
ffo ef ni. Ac yna marchogaeth a|wnaethant yny doethant
yn agos y|r casteỻ. ac o|e blaen ỽynt a|welynt yn dyuot ar
| « p 161v | p 162v » |