Breudwd Welsh Prose 1300-1425
Cymraeg

NLW MS. Peniarth 12 part ii – page 50r

Ystoria Lucidar

50r

boen yỽ kadwyneu tanỻyt yn rỽymaỽ yr hoỻ aelodeu. discipulus Pa+
ham y|diodefant ỽy y saỽl drueni hynny. Magister Am weỻygyaỽ
o·honunt yng|kedymdeithyas naỽrad yr engylyon. kyfyaỽn o+
ed eu poeni ỽynteu o|r kyfryỽ naỽ poen hynny. kanys y rei
a ymlosges yma o|dan cam|chwant. iaỽn yỽ eu ỻosgi ỽynteu
yn|y tan hỽnnỽ. a|r neb a sychaỽd yma o oeruel drygyoni.
iaỽn yỽ eu kyruachu ỽynteu yno o|boenedic oeruel. kanys
ef a|dywedir y byd kyn wynnet pan|del odieithyr gỽres y|tan
a|r haearn yn|yr aelỽyt. ac yn rewi o vyỽn megys pibonwy. neu
iaen y gaeaf. val y dywedir. Wynt a|gerdant o|dyfred gormod
eu gỽres ormod. a|r neb y|bu kynghoruynt a chas ganthunt
yma. Megys pryfet yn knoi. dylyedus yỽ bot pryfet yn eu
hyssu ỽynteu yno. ac am na mynnassant kymryt yma
namyn trigyaỽ yng|godineb. kyfyaỽn yỽ bot drewyant yn
eu poeni ỽynteu yno yn arỽ. ac am na mynnassant kymryt
kosp na phoen gyt a|dynyon yma. ỽrth hynny y ffustir ỽyn+
teu ac ysgyrseu yno. heb orffowys megys y|dywedir. Paraỽt
yỽ y brodyeu yr gỽattwarwyr y guraỽ ac yrd kyrff yr ynuyty+
on. ac am garu o·honunt tywyỻỽch godineb yma. ac na
mynnassant dyuot y oleuni crist. ỽrth hynny y kaffant ỽy
dywyỻỽch aruthyr y eu|poeni yndaỽ. megys y|dywedir.
Ny welant oleuni yn dragywyd. ac am|weỻygyaỽ ohonunt
kyffessu eu pechodeu ny bu gewilyd ganthunt eu gỽneu+
thur. ỽrth hynny y noethir ỽynteu yn|dragywyd y baỽp yr
kewilyd a chythrud yno. ac am na mynnassant welet da
na|e glywet yma. iaỽn yỽ eu kyflenwi ỽynteu yno o druan
weledigaeth. ac aruthur glywedigaeth. ac am drossi ohonunt.