Breudwd Welsh Prose 1300-1425
Cymraeg

NLW MS. Peniarth 18 – page 34r

Brut y Tywysogion

34r

vedỽl yỽein tyỽyssaỽc deissyuyt leỽenyd o racỽele+
digaeth duỽ a|e kyuodes. kanys yr un ryỽ oỽein a
gyffroes lu y|arlỽystli hyt ynn llann dinan. A gỽe+
dy cael diruaỽr anreith o anadunt* ymgynnull+
aỽ a oruc arỽystli amgylch trychannỽyr ygyt. a
hoỽel ap ieuaf y harglỽyd. y ymlit yr anreith. a
phann ỽelas oỽein y|elynyon yn dyuot yn deissyfe+
dic annoc y|ỽyr y ymlad a|oruc. Ar gelynyon a|ym+
hoelassant ar ffo. gann y llad o|yỽein a|e ỽyr ynny
uu ureid a|dieghis y|trayan adref ar ffo. a|phann
gyfuleỽnis y|llyỽenyd hỽnnỽ vedỽl a|bryt y|tyỽyssa+
ỽc yna yd ymhoelaỽd ar gysseuin anssaỽd y|vedỽl
ỽedy y|rydhav o|e gymeredic tristit. Ac atgyỽeiraỽ
y|gastell a|oruc. Y ulỽydyn racỽyneb y|dygyỽydaỽd
carrec oua y|gann yỽein ap grufud. Ac yỽein ap ma+
daỽc. A maredud ap hyỽel. Yn|y ulỽydyn honno y
kyffroes henri urenhin lloegyr lu yn erbynn de+
heubarth. Ac y deuth hyt ym|penn cadeir. A gỽedy
rodi gỽystlon o rys idaỽ ymhoelut y|loegyr a|oruc.
Ac yna y|llas einaỽn ap ynaraỽt yn|y hun y|gann
ỽallter ap llyỽarch y|ỽr e|hun. Ac y|llas cadỽgaỽn
ap maredud y|gann ỽallter ap ridit. Ac yna y|ky+
merth rys ap grufud y|cantref maỽr. a|chastell dine+
uỽr. Yn|y ulỽydyn honno y bu uarỽ kediuor ap
daniel archiagon* keredigyaỽn. Ac yna y|bu va+
rỽ henri ap arthen goruchel athro argyffredin