NLW MS. Peniarth 190 – page 104
Ystoria Lucidar
104
1
drỽy chwerwed y angheu. discipulus Ae ỻes y|r rei drỽc
2
orwed yn hir yn eu gỽely kynn eu marỽ. Magister
3
Na|les. kanys o ba angheu bynnac y bont
4
ueirỽ. yn deissyfyt. yn|drỽc. y teruynir ỽynt
5
kanny medylyant am eu marỽ. ac am hyn+
6
ny gỽaethaf angheu yỽ vn pechadur. discipulus
7
Ae drỽc y|r rei gỽirion na chaffont eu cladu
8
yn|y kyssegyr. Magister|Nac ef. yr hoỻ vyt yssyd dem+
9
yl y duỽ. kanys kyssegrỽyt o waet crist. ỽrth
10
hynny beth|bynnac a|wneler na|e cladu ym
11
maes. nac yng|koet. nac yng|gwern. nac yn
12
ỻe araỻ y byrer ỽynt. na|e hyssu o vỽystuileit
13
nac o bryfet. ỽynt a|achlessir yn arffet yr eglỽ+
14
ys yn wastat yr honn yssyd dros wyneb yr
15
hoỻ vyt. discipulus Ae da udunt ỽynteu eu cladu yn
16
y kyssegyr. Magister|ỻawer ỻe a gyssegrir o|r rei gỽi+
17
rion a|glader yndunt. discipulus|Ae ỻes y|r rei a vo
18
yn|y poeneu amseraỽl eu cladu yn|y kysse+
19
gyr. Magister ỻes wrth wediaỽ drostunt o eglỽys duỽ
20
a|dyuot eu kenedyl a|e|kedymdeithyon y we+
21
diaỽ drostunt ac vch eu penneu yn|yr eglỽys+
22
seu ac yn|y mynnwennoed. discipulus Ae da y|r rei drỽc.
| « p 103 | p 105 » |