NLW MS. Peniarth 190 – page 124
Ystoria Lucidar
124
kanys pob sỽỻt cudyedic a vyd amlỽc idaỽ.
O|r eil mod y darostỽng y tlodyon idaỽ rac
y ovyn. kanys y creulonder mỽyaf a wna
ef y|r neb a|gretto y duỽ. O|r trydyd mod ef a
dwyỻ ac a|darostỽng yr ysgolheigyon idaỽ
o|e doethineb a|e huolder. kanys ef a|wybyd yr
hoỻ geluydodeu a|r yscruthyr yn vyuyr. O|r
pedweryd mod ef a|dỽyỻ y creuydwyr o arỽy+
don a|gỽyrtheu. kanys ef a|wna anryued+
odeu aryneigus. megys peri tan o nef y
losgi rac y vronn y neb a vo yn|y erbyn. a
chyuodi y meirỽ y rodi tystolyaeth idaỽ.
discipulus Ae ky·uyt ef ỽyntỽy yn wir. Magister Nac ef. na+
myn kythreul o|e drycweithredoed a|gyrch y
myỽn corff dyn emeỻdigedic. ac a|arwein
hỽnnỽ ymdanaỽ. a|dywedut trỽydaỽ me+
gys y gỽelit y vot yn vyỽ herwyd y dywedir.
Geuaỽc vyd y hoỻ weithredoed ef yn|y hoỻ
wyrtheu a|e arwydon. ac ef a|adeila o new+
yd hen gaerussalem. ac yno yd eirch ef y
adoli yn wir duỽ. a|r Jdewon a|deuant o bop
mann o|r byt yn|y erbyn ef yn anrydedus.
| « p 123 | p 125 » |