NLW MS. Peniarth 190 – page 146
Ystoria Lucidar
146
a phob ryỽ olut. ef a|welir y minneu pei
eidaỽ dyn vei rei o hynny ny dywedaf yn+
neu am gỽbyl ohonunt ỽy y bydei deilyng+
ach ef no|r hoỻ vyt. O|r bydei eidaỽ ynteu
hynny o gỽbyl ef a|welit y vot yn|duỽ. Magister.
Jaỽn y berny di hynny. discipulus O degỽch y seint
weithon. Magister Tegỽch absalon a|vydei dybry+
dỽch yno. kanys eu tegỽch ỽy a vyd megys
eglurder yr heul. megys y dywedir. Y rei
gỽirion a|disgleirant megys yr heul. a|r
heul yna a|vyd tegach seith·weith noc yr
aỽr honn. megys y dywedir udunt. Duỽ
med ef a|atnewyda corff yn ufuddaỽt ni
y·n gyffelyb y eglurder yr heul. ac nac
amheuet neb vot yn|degach corff crist no|r
heul. kanys tegach vyd corff y creaỽdyr
no|r creadur. a|dynyon a|dywedir eu bot
yn|demyl y duỽ. ac ny dywedir bot yr heul
ueỻy. ỽrth hynny y byd y seint yn gorff
eglurder crist yr hỽnn yssyd loewach no|r
heul. a|duỽ yn pressỽylaỽ yndunt megys
y|myỽn temloed duỽ. yn vỽy eu tegỽch a|e
| « p 145 | p 147 » |