NLW MS. Peniarth 190 – page 172
Ymborth yr Enaid
172
o anuod y perchennaỽc. Anudon yỽ. ka+
darnhau kelwyd trỽy lỽ. Kelwyd yỽ. dyw+
edut ffalsed trỽy ynni* tỽyỻaỽ araỻ. Treis
yỽ. yspeilyaỽ araỻ o|e anuod am y da yn
anghyfarch. Anghyfarch yỽ. kymeỻ araỻ
yn anghyvreithyaỽl y wneuthur y peth
ny|s|dylyo. Anorffoỽys neu aflonydvch
yỽ. Kyffroi araỻ yn enwir. heb achaỽs
drỽy gam·rodi barn yn anghyfreithya+
ỽl yr caryat. neu yr ovyn. neu yr chwant
da. Drudannyaeth yỽ. kynnal yn ormod
gyt a|r drỽc. Brat yỽ. somi araỻ yn dỽy+
ỻodrus. neu gaỻder chỽioglus. y sommi
araỻ drỽy wenyeithus gynhebygrỽyd.
Tỽyỻ yỽ. dirgeledic vaỽr dynget drỽy wen+
nyeithgar gyueiỻach. y sommi araỻ. Falsed
neu dicheỻ yỽ. kudyaỽ drycvuched drỽy dỽ+
yỻodrus ymdangos kyffelybrỽyd santeid+
rỽyd. ymoỻỽng yỽ. ymrodi yn|wahanreda+
ỽl y gynnuỻaỽ da bydaỽl. heb oledyl* na che+
wilyd. na diarbot pa wed y kaffer. Kamwed yỽ.
| « p 171 | p 173 » |