NLW MS. Peniarth 190 – page 43
Ystoria Lucidar
43
gỽbyl gỽedy ry darostỽng y·dan y draet ef et+
to. kanys y maent yr idewon yn gỽattwar am+
danaỽ. a|r sarassinyeit yn|y geỻweiryaỽ. a|r
rei yssyd a|cham·gret ganthunt yn|y dryỻyaỽ.
a|r rei drỽc yn ymlad ac ef. ac ueỻy yn|y aelo+
deu e|hun y mae beunyd yn|y diodef. pan gyn+
nuỻo ef oỻ hynny attaỽ. yna y keiff ef y gyf+
laỽn lewenyd. discipulus Pa|delỽ y mae yr eglỽys yn
gorff idaỽ ef a|r etholedigyon yn aelodeu idaỽ.
Magister|Megys y mae y corf yngglyn ỽrth y penn.
a|r penn yn|ỻywyaỽdyr arnaỽ. veỻy y mae yr
eglỽys drỽy leyndyt corf crist. gỽedy ry gys+
syỻtu ỽrthaỽ ac vn ac ef. a|phaỽp o|r rei kyf+
yaỽn yn|y vrdas megys aelodeu. a|r penn
hỽnnỽ yn|y ỻywyaỽ. ỻygeit y penn hỽnnỽ
yỽ y proffỽydi a|dywedassant y petheu rac
ỻaỽ. a|r ebystyl a|dugant ereiỻ o fford gyfeily+
orn y oleuni gỽirioned. Y clusteu ynt y rei
a|warandaỽont. Y ffroeneu ynt y doethon
dosparthus. Y gỽlybỽr a|vyrir ymeith o|r ffro+
eneu ynt. y dynyon a chamgret ganthunt.
| « p 42 | p 44 » |