NLW MS. Peniarth 32 (Y Llyfr Teg) – page 150
Llyfr Iorwerth
150
yn hynny. ỽrth hynny y mae ynteu yn vn+
werth a hynny oỻ. Tri arperigyl dyn; dyr+
naỽt ym|penn. hyt yr|emenhyd. a dyrnaỽt yn
y gorff hyt yr amyscar. a thorri vn o bedwar
post y corf. Teir punt a|geiff y neb a archoỻer
y gan y neb a|e harchoỻo veỻy. Sef yỽ meint
y vedeginyaeth; punt heb y vỽyt. neu naỽ
ugeint a|e vỽyt a|e waet·diỻat. Medeginya+
eth goreth; pedeir ar|hugeint. Medeginyaeth
rud·eli; deudec keinhaỽc. Medeginyaeth ỻysseu;
pedeir keinhawc. kyfreith. bỽyt y medyc beunoeth; keinhaỽc
a|dal. Teir creith gogyfarch yssyd. vn ar droet;
dec ar|hugeint a|dal. araỻ ar laỽ; trugeint a
dal. araỻ ar wyneb; chweugeint a dal. Pob
creith gudyedic; pedeir keinhaỽc kyfreith. Pop as+
cỽrn tỽnn; vgeint. ony byd amrysson am y
vychanet. ac o|r byd; kymeret y medyc caỽc euyd.
a|dodet penn y elin ar y ỻaỽr. a|e laỽ vch·penn
y caỽc. ac o chlyỽir y sein; pedeir keinhawc. kyfreith. ac o·ny
chlyỽir; ny dylyir dim. Gỽerth gỽaỻt bonwyn.
keinhaỽc am bop bys a el yndaỽ. a dỽy am y
vaỽt. Gỽerth gỽaet ryd; pedeir ar|hugeint.
Gỽerth gỽaet kaeth; vn ar|bymthec. Sarha+
et pob dyn; herỽyd y vreint. y telir idaỽ. Tri
gỽaet ny diwygir. gỽaet deint. a|gỽaet crach.
a gỽaet trỽyn. Y|r arglỽyd y telir dirỽy amdanunt.
| « p 149 | p 151 » |