Cardiff MS. 1.363 (Hafod 2) – page 28r
Brut y Brenhinoedd
28r
chaffael y wudỽgolyaeth. Ac gwedy gwedỽ pob
peth ydaỽ yn y tryded wlwydyn gwedy hynny y
bỽ ỽarỽ llyr. ac y bỽ ỽarỽ aganyppỽs brenyn ffrey+
nc. Ac yna y kymyrth cordeylla llywodraeth tey+
rnas ynys prydeyn yn|y llaw e|hỽn. Ac y cladwyt
llyr ym meỽn dayar·ty a|wnathoed a dan aỽon
sorram yg kaer llyr. Ar temhyl honno ry wnat+
hoed llyr yn anryded yr dyw a elwyt byffron+
tys Jany. A phan delhey gwylỽa y demhyl honno
y deỽhynt holl crefft·wyr y|dynas|hỽnnỽ ar rey
y wlat hyt yd ymkyrreyddynt o|y hanrydedỽ. ac
yno y dechreỽynt pob gweyth o|r a dechreỽynt
hyt ym penn y wlwydyn o|r ỽn amser hỽnnỽ.
AC yna gwedy gwledychỽ cordeylla trwy ys+
peyt pym mlyned yn hedỽch tagnhevedvs
y kyỽodassant y deỽ neyeynt meybyon y ch+
wyoryd. nyt amgen. margan ỽap maglaỽn
a chỽneda ỽap henwyn a dechreỽ ryỽelỽ arn+
ey kanys blwng ac antheylỽng oed kanthỽnt
bot llywodraeth ynys prydeyn ỽrth ỽedyant g+
wreyc. Pob ỽn hagen o|r deỽ was yeỽeync hynny
| « p 27v | p 28v » |